El petegolon
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← El sventadon | Edission e fonte ▼ | El fredoloso → |
EL PETEGOLON
Vu che andè sempre atorno a squaquarar
Quelo che un altro ve confida in recia,
Vignì un momento qua, fiol d’una tecia,
Che ve voi su sto ponto interogar.
Cossa v’à reso el vostro pampanar?[1]
Quel remenarve pezo d’una secia?
D'esser sprezià più d’una scarpa vecia
Che nissun zavatin pol repezzar.
Mi, che nemigo son dei complimenti,
Ve mando nel paese de colù
Co tuti i vostri nobili parenti.
E saveu cossa fazzo se per caso
Incontro una carogna come vu?..
Levandome 'l capel me stropo el naso.
- Note
- ↑ Ciarlare esagerando.