El cafè Florian

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
Wikipedia logo
Varda anca la vose Caffè Florian su Wikipedia.
XXVIII. El cafè Florian
(a Baldassarre Avanzini)
1892
←  XXVII. Oh che momenti! Edission e fonte ▼ XXIX. S'anca no go nè onori ne richeze  →
[p. 31 modifica]
XXVIII.


EL CAFÈ FLORIAN

(A BALDASSARE AVANZINI)

1


Simpatico cafè pien de memorie,
Dove se unisse tute le nazion,
Dove galegia çentomile borie
E per sapiente passa el più mincion,

Ne le to bele camare la zente
Capisse el proverbiàl dolçe far gnente,

E destira la fiaca a ciacolar,
Convinta che no resta altro da far.

[p. 32 modifica]


2

I bei vecieti, i veci tirai su,
Che sente ancora el sangue ne le vene,
Che sente viva in cuor la zoventù,
E da 'l tempo no vol pesi o caene;

I veci ancora forti e prosperosi,
Che se scalda e se impizza come tosi,

Vien al cafè, se unisse ai zovenoti,
E ciàcola de done e de ridoti.

3

Ma quei che sente su le grame spale
El peso dei setanta ani calar,
E se strassìna in sta noiosa vale,
Sospirando che indrìo no i pol tornar,

Quei là dì e note parla, se dileta
A semenar le idee de la Gazeta;

E per bisogno e impulso natural,
Beve el cafè, tabaca e dise mal.

[p. 33 modifica]


4

Qua i zovenoti ciàcola, se move,
Fuma, leze i zornai, pìsola e zoga.
Qua i toseti, che fa le prime prove,
Mormora dele fèmene più in voga.

Qua se pesa e conosse tuto e tuti,
Povari e siori, onesti e farabuti.

E per passar el tempo alegramente,
Se fa de tuto per no far mai gnente.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=El_cafè_Florian&oldid=49087"