El Zarlatan (Luigi Bampo)
|
Edission original: |
Luigi Bampo, Miscellanea o trentacinque cose per trentacinque soldi, Treviso, Francesco Andreola, 1828 |
|
Fonte: |
Indice:Bampo - Miscellanea o trentacinque cose per trentacinque soldi, Treviso, Andreola, 1828.pdf |
| ← Il morto parlante | Edission e fonte ▼ | L'Organista → |
Un zarlatan giera ridoto al verde
In modo tal, che un piato
De polenta e sufioni
A lu gavaria fato
L'istesso efeto, che ghe fa a qualch'altro
I più sielti boconi.
De coragio per questo nol se perde,
Ma el va studiando come se pol far
Qualcossa a vadagnar
A spale dei minchioni;
E defati sentì cossa el se pensa.
El va da dei vilani
(Ma de quei che ga el pevare)
E vedendo che in stala
Ghe gera una cavala,
El ghe domanda un pochi de ninioi
Per far suso una spezie de casoto,
E po el se taca a corar per la vila
Zigando: oggi, deboto
Se faranno vedere un animal
Non più veduto, che ganno la testa
Dove che i altri portano la coa;
E non si paga che due soldi a testa. —
Figureve la fola, che in t'un atimo
S’à racolto alla porta,
Vechi, donne, putei, tuti ghe porta
I do soldeti, e aspeta el bel momento.
Co 'l drito è stà contento,
L'à spalancà la tenda,
E s'à visto la bestia
Che tocava col cul la magnaora.
Per un bon quarto d'ora
El popolo zucon xe restà là
Incocalio, estatico, incantà;
Co a Dio ga piasso l'à magnà la fogia,
Ma tropo tardi, perchè quel amigo
No avendo de bruscar gnente de vogia,
Fin dal principio se l'avea mocada,
Ridendo come un mato per la strada.