El Putelo e la Luna (1817)
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
1Una bela damina, e taso el resto
Perchè no vogio chiacole per piazza,
Avendo el primo maschio, l'à volesto
Arlevarselo ela, poverazza!
So mario, che gaveva poco sesto
Siben ch'el gera Senator de razza,
El l'à lassada far; ma quel putelo
Presto a la mama à rebaltà el cervelo.
2Cossa serve... La gera incocalìa.
Pisselo in leto? Povereto, el sua:
Ròmpelo la spechiera? Vita mia,
Varda, per carità, no te far bua.
Diselo un'insolenza, una busìa?
La ghe dà un baso e po un graspeto d'ua.
Dalo un pugno sul muso al sior maestro?
— Che bufoncelo, che maton, che estro!
3In soma per paura ch'el se amala
No la vol che nissun ghe contradiga.
El regazzo, che sa che mai nol fala,
El fa tuto a so modo, el se destriga.
Se no i xe pronti a darghe su la bala,
El va in furor, el pesta, el rompe, el ciga;
E de set'ani apena, quel frascon
Gera un Atila in erba belo e bon.
4El papà Senator vedeva el puto
Da l'amor de la mama sassinà,
Ma nol gaveva cuor de farse bruto
In fazza de la so cara metà.
I parenti diseva senza fruto,
I amici no gaveva autorità,
Ela po, se anca i tenta iluminarla,
Gh'à el don de Dio de no ascoltar chi parla.
5Mentre la stava un dì lezendo sola,
O ingropando panele... uh che rumor!
Da la corte sbregandose la gola,
Quel bardassa cria: mama... con furor.
La buta tuto al diavolo, la svola:
Indovinè mo perchè? un servitor
Ghe negava una cossa fora d'uso,
E lu da rabia se sgrafava el muso.
6Pezzo d'aseno, forca, dì, perchè
No ghe portistu subito corendo
Quelo che 'l vol? se in casa no ghe n'è,
Birbante, va a comprar; son mi che spendo;
Ubidissilo in bota. Ma el lachè
Strenze le spale, e risponde ridendo:
Celenza, el pol cigar fin a doman
Che no ghe dago gnente da cristian.
7La torna su furente in convulsion;
So marìo gera in camera d'udienza,
La ghe conta l'ardir de quel bricon,
La ghe manda de mal la Conferenza,
Tuti va a la fenestra; e dal balcon
Co un pegio da Caovechio, so Celenza
Dise al lachè: Ubidissi temerario,
O te cazzerò via senza salario.
8— Ma... za paron, ste cosse, con permesso,
No le se ghe fa bone gnanca in cuna:
El vardava in quel sechio, e per riflesso
L'à visto in acqua a bagolar la Luna;
Sala mo cossa ch'el vorave adesso?
Se la parona ghe ne pol dar una,
Mi no per brio! nol vol minga el regazzo
L'acqua nel sechio, el vol la Luna, c....!
9Ride tuti, compreso la parona,
A sto spropositazzo da paela:
Ma la ghe pensa su, la ghe ragiona,
El zorno dopo no la par più ela,
Coi speroni e la scuria la scozzona
El so pulier; l'à portà brena,, e sela...
Oe... l'è stà Consegier de Santa Crose,
L'è andà su come Rosso, e morto Dose.