El Grilo e la Farfala
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Sconto là tra l'erba e i fiori
Stava un povero Grileto,
Contemplando con dispeto
4Un superbo Calalin.
Su quatro ale fine fine
De magnifico lavoro,
Ghe brilava in mezo a l'oro
8El smeraldo col rubin.
Che bel vederlo a capricio
Lasciveto andar svolando,
Sal e spirito robando
12A la rosa, al zensamin!
Ma diseva tra lu el Grilo!
Che giustizia xe mo questa?
Me darave un pugno in testa
16Quando penso al mio destin!
La natura incocalìa
De quei corni che l'impira,
A lu tuto, e qualche lira,
20E a mi gnanca un bagatin!
A lu grazie, vezzi e doni,
A mi i sali d'una zuca!
Via metème la peruca
24Che son proprio un figurin.
Gh'è nissun mo che me varda?
No i sa gnanca che ghe sia,
Creparò de sora via
28Soto el stalfo d'un fachin.
Mo no gera megio assae...
Corpo e taca... de lassarme
Nel mio vovo, che menarme
32In sta gala, a sto festin?
Dà su intanto ch'el taroca,
Oto, diese punti in fola,
Che tornava da la scola
36Morsegando el Calepin.
Vista apena la Farfala
Veramente bela e rara,
Tuti i core, tuti a gara
40Tenta farghene botin;
E chi spiega el fazzoleto,
Chi la man stende bel belo,
Quelo sporze el so capelo,
44Questo buta el baretin.
Fa de tuto per salvarse
Quela povera Farfala,
La va su, ma po la cala;
48Se la cuca el più vicin.
Tuti alora ghe xe adosso,
Chi la testa, chi un'aleta,
Chi ghe strazza la coeta!
52Bona note Calalin.
Quando el Grilo che spiava
Vede come l'à finìo;
Mo minchioni! el dise, sciò,
56Che el se peta el so morbin!
El brilar, a quel che vedo,
Costa tropo; adio sior mondo,
Torno in buso, me sprofondo,
60Vado a farme Certosin.
Fioli cari, avemo tuti
Mal e ben in varia dose,
Ma chi spica sempre rose
64Più dei altri dà nel spin.