El Campanil de Samarco
|
Edission original: | |
|
Fonte: |
Indice:Luigi Cappello - Dai rovinassi del campanil, 1905.pdf |
| ← Ai me soneti | Edission e fonte ▼ | A la prima piera del Campanil de Samarco → |
El Campanil de Samarco
(Rebaltà zo la matina del 14 luglio 1902)
OH vecio campanil, santa memoria
dei cari mii, de la me zoventù;
oh biblioteca de gloriosa storia
scolpìa su l'oro indrentovia de nu;
ombra tranquila in mezo a un mar de gloria
luse, splendor dei secoli su, su
verso del ciel brilando senza boria,
dove xestu, che no te vedo più?
In sto momento quà che 'l mondo intiero,
metendo ogni altra ocupazion da parte,
sente el tuto che inorba el nio de l'arte,
dimostrarave el cuor ben basso e vil,
se no pianzesse co dolor sincero
la to rovina, o vecio campanil.