Chi à tempo no aspeta tempo (1822)
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
Un povero vilan,
Vedendo, che un ricon del so paese
Andava ogni qual trato
Per consegj in mezà d'un Avocato,
5El dise fra de lu:
Che i sia gnanca i consegj, che fa richi?
Vòi provar anca mi, vogio un consegio!
S'anca lu me costasse el bon, e 'l megio.
El va donca ala presta
10Con do grossi dindioni
Da un avocato; ma de quei de testa,
Che visti quei bestioni,
Ghe dise al bon vechieto:
Cossa voleu da mi?
15El contadin responde: un consegeto.
Un consegio volè?
Sogiunge l'Avocato, e ben parlè.
Ma continua el vilan: vogio un consegio,
No so po' dirve qualo;
20Ma quel, ch'a vu ve par...
Demelo, via, che è vostro sto regalo.
Son qua, ve servo in bota,
Responde l'Avocato al bon marmota:
Chi à tempo, vita mia, no aspeta tempo,
25E in sto mentre el ghe leva dale man
I do dindioni al povero vilan,
Che tanto lo ringrazia, e volta via,
Tuto pien de contento, e d'alegria;
E zonto a casa, el varda el so formento,
30Che no gera ben fato in quel momento;
Ma nonostante lu lo fa tagiar,
E i so fioli se taca a biastemar;
Noi biastema per altro el zorno drio,
Che casca un tempeston, ne varda Dio!
35Anzi i conferma tuti tre d'acordo,
Che chi trascura el tempo xe un balordo.