Arringa sul Decreto di Abolizione de' Frati/16
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← XV | Edission e fonte ▼ | XVII → |
Qua bisogna che mi gh’apra una scena
La più lugubre, lagrimosa e trista
3Che mente possa imaginar apena!
Che in Republica mai l’ugual fu vista
Nel vastissimo giro de le età
6Onde Dio vol che ancora la sussista;
Che mai nè pur xe stada vista là
Dove sin da l’abisso l’eresìa
9Contro la Chiesa la s’à scatenà.
Nè d’oratoria l’è, nè de poesia
Un artifizio questo, o un ritrovato
12Di una faconda calda fantasìa,
Ma l’è più tosto a la Razon de Stato
Un colpo che la manda in soversion
15Con ecidio total del Prencipato.
Chi me darà la voce e l’espression
Adatade a sto tragico sogeto
18Per poderghe far ben la descrizion?
Come unirò la libertà al rispeto,
I riguardi al caratero sincero,
21La politica al dir libero e schieto?
Ma, viva Dio, che vogio dirghe el vero
E dirghelo ghel vogio schieto e neto
24Perchè de niente temo e niente spero,
Col progeto del gran Regolamento
De doverse eseguir su le Man-morte,
27Dopo un longo e maduro pensamento
L’à credudo poder far cambiar sorte
A le publiche cose e a le private
30Riaprendoghe al bon ordine le porte,
Perchè Seniores, et in dignitate
Costituti, e tra questi i più sapienti.
33Direti dal poder del so Primate1
I à fato i so disegni su i Conventi,
Sora le Chiese e sora i sacri aredi
36Al servizio de Dio solo inservienti.
No le creda che esageri e che ecedi,
Ghe digo che la prima cosa è stada
39Darghe a Santi e a Madone i so’ congedi.
Le se prova ele de dar un’ochiada
In prima atorno questa Dominante
42Da sto progeto meza sfigurada.
Le zira per un poco tute quante
Le Contrade, e le cerca ogni Sestier,
45I Canali, le Strade, e tante e tante
Strade dove sia Chiesa e Monastier;
E le diga, se alcuna ghe ne resta
48Imune, salva, ilesa da veder.
Le scora col pensier cussì a la presta,
La Tera-ferma; le scora più Contadi
51D’istruzion privi. Adesso le se aresta.
Le veda un poco come sia tratadi
I Frati ne la mensa, nel vestiario,
54E come in ogi i sia consideradi!
Le diga, se in sto dì ghe sia divario
Tra una persona sacra e un servitor,
57Che forse assae più l’à de salario;
E po’ (quelo che più me fa stupor)
L’è el veder che se fa tanto strapazzo
60Ugualmente del doto e del signor,
E che i se meta tuti quanti a mazzo
Sino i patrizj stessi co i plebei,
63Che no gà, a cussì dir, gnanca el pagiazzo;
E come i fusse aponto tanti rei
I se trata con tale e tanta asprezza
66Co scandolo d’Eretici e d’Ebrei.
Epur la magior parte gera avezza,
Prima de farse Frati, in le so’ case
69A viver con decenza e morbidezza!
Ma quel che sora tuto me despiase,
L’è veder che sia stada messa man
72In quello ch’è fondamento e base
D’ogni Governo, o sia d’ogni Republica;
Democratico overo Aristocratico,
75Anarchico, o sia Despota o Sovran!
Mi ghe confesso el vero; resto estatico
Che per uno che assae de lu presume,
78Per un che a tuti i segni xe un fanatico,
Lassèmo che s’estingua in nu quel lume
Che ne serve de scorta e de veicolo
81A la Rason de Stato e al bon costume;
E che sia esposto a un prossimo pericolo
El publico interesse, e ’l nostro nome
84Da l’estere Nazion messo in ridicolo;
E ghe sarà chi me dimanda el come?
- Note a cura de Bartolommeo Gamba
- ↑ Seniores il magistrato de’ X Savj. In dignitate, la Deputazione alle Man-morte. I più Sapienti i Savj Grandi. Il Primate non si nomina per riguardo.