Arringa sul Decreto di Abolizione de' Frati/14
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← XIII | Edission e fonte ▼ | XV → |
Mi no ghe lezo Fiabe nè Gazete,
Ghe lezo cose che al so’ Giudicato
3Mi ghe assogeto a carte otanta sete.
Questo xe el gran Decreto del Senato
Col qual ne l’ano mile seicento
6E cinque l’à proibìo per tuto el Stato
Qualunque sorte de possedimento
Che o per aquisto entrasse in le Man-morte
9Per Donazion, o sia per Testamento.
Mi no so come fora de ste Porte1
Possa esser nata sta Legislazion,
12Quando che i gran contrasti co la Corte
De Roma, alora in gran fermentazion,
No avesse tratenudo i Citadini
15Dal proromper in gran tumultuazion,
Con pericoli esterni ed intestini
Contro un’autorità che gera andada
18Fuora dei naturali so’ confini.
A sto Decreto demoghe un’ochiada,
E ghe prometo che le sentirà
21Cosa che mai le se sarìa aspetada!
E sale quando le rimarcherà
El mal che ghe xe drento de sto Edito?
24Quando ch’ele lo confronterà
Con quel che nei do’ primi xe stà scrito
Dal Comun. E qua el gran Consultor
27Ch’el vegna via con quelo che l’à scrito!
Le senta mo adesso quale sia el tenor
De sto Decreto... Via, sior Segretario,
30Fin che lezè mi taso. Fève onor...
Co gh’ò da dir el vero mi zavario
Sora de sto Decreto che no intendo,
33Nè posso rilevar sto formulario.
Le toleri, le prego, se m’estendo
Un poco tropo sora de sta Carta
36Per spiegarghe come la comprendo.
Vostre Zelenze no le se disparta
Da le do’ prime Legi che gh’ò leto
39Co le vogia che questa ghe la scarta,
Mi ghe domando a sto bel umoreto
Come ’l vogia piantarme st’eresìa
42Con tuto el so gran sforzo d’inteleto:
Vorìa ch’el me disesse, dove stìa
El gius, o sia el poter legislativo
45In sto Governo d’Aristocrazia?
Sto gius l’è un gius afato privativo
Che nel Mazor Consegio sol risiede
48Per massima e prencipio decisivo.
Quando Vostre Zelenze me concede
Sto ponto (al qual mai ghe sarà nessun
51Che se ghe possa oponer) ele vede
Che ogni Lege che fuora del Comun
Vegnisse fata, mai sovranamente
54No la poderìa mai aver alcun
Valor, perchè el sarìa infalibilmente
Un snervarghe le forze a quel oracolo
57Col qual se spiega la publica mente,
Quando, a dirghela schieta, l’è un miracolo
Che s’à provà de far i Savj, quando
60A bon ora i s’à acorto de l’ostacolo
Del qual ghe n’ò dà un ceno: ma, parlando
De sto Decreto, me sarà permesso
63De andarlo un poco megio esaminando.
Come mai se pol dar che sia stà espresso
Sto Decreto, che adesso le à sentio
66Con quela frase e con quel modo istesso
Che saria stada espressa, a parer mio,
Una Legislazion del Corpo intiero
69De la Sovranità? Ma, santo Dio!
Vorle veder come che digo el vero?
Le me permeta che mi tioga suso
72Sta Carta un’altra volta, e po mi spero
De persuaderle. Cosa xe sto abuso
Ch’el Gius Legislativo o sia Imperante
75Sia da quel zorno in qua sempre confuso
Tra ’l Delegato e ’l stesso Delegante?
Le sofra, mi le prego, che su questo
78Ghe diga quelo che xe più importante;
Donca, Sior Segretario, via mo presto,
Lezeme un’altra volta sto Decreto,
81Perchè mi vogio comentarne el resto
Per poder po’ svelar tutto el segreto.
- Note a cura de Bartolommeo Gamba