Arringa sul Decreto di Abolizione de' Frati/13
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← XII | Edission e fonte ▼ | XIV → |
Le senta mo quel ch'el Mazor Consegio,
Cioè la Legislativa Podestà,
3L'ordena dopo dal Sovran so' segio,
Senza che niente mai sia derogà1
A quel che in altra soa Legislazion
6Che adesso mi gh'ò leto, l'à emanà?
Le prego a renovar la so' atenzion
Perchè me preme assae ch'ognun sia istruto
9Su quel che xe de pochi a cognizion.
El Franceschi scomenza a far el bruto!
Nel mile cinquecento trenta sie,
12Via, ai trentaun de decembre, per dir tuto.
Sul Consegio... cioè: Opere Pie...
Le prego, le rifleta a sti ani diese!
15Qua cavève dai ochi le scarpìe
Sior Piero, o disè pur che no avè intese
Espression cussì chiare e convenienti
18Che no le amète dubj nè contese.
A sto Dogado... Le ghe staga atenti,
Perchè su sto Dogado mi in apresso
21Farghe ghe doverò bravi comenti.
Et cetera... E qua quel ch’in apresso
Vien de sta Parte ghe farò veder
24Che l’è a tenor de quel che gh’ò promesso
De provarghe. Bisogna o ben saver
Intender el volgar de sto Latin,
27O pur bisogna certo straveder
Per sostentar che qua un diverso fin
Abia avudo el Consegio co sta Parte,
30Che, a mio parer, la stà drento al confin
De la prima, perchè in tute ste Carte
Ele ben sentirà, che preservadi
33El vol i Loghi Pii, nè el se departe
Da sta Massima; e che sol regoladi
El vol i abusi che anca sin d’alora
36De quando in quando gera contempladi.
Qua ghe voràve tempo più d’un’ora
Per comentar sta Parte, ma ghe basti
39Do’ cose sole esaminar per ora;
La prima xe (e qua no gh’è contrasti)
Ch’el Comun sempre preservar l’intende
42I Loghi Pii, e che per quanto vasti
Sia st’impegni, che i vol, o che i pretende
Cambiar in distruzion una Riforma
45No i sa quel che i se diga; perchè tende
Sta Parte solo a stabilir la forma
Dei Loghi Pii, senza stacarse mai
48Da quela prima regola o sia norma
Che prima ai Diese Savj, e po al Pregai
Xe stà racomandà, aciò su questa
51I stia in farla eseguir sempre piantai.
Quelo che in sto ponto anca me resta
De dir, el dirò dopo terminada
54La letura co l’ordene che in testa
M’ò proposto, perchè no sia alterada
Sta materia cussì vasta e gelosa,
57E tuta la ghe sia delucidada.
Adesso vegno a la seconda cosa
Che gh’ò acenà, se le se l’arecorda
60Su sto Dogado ghe vòi far la glosa.
Co sto gran Consultor no se la scorda
Vorìa saver cosa che l’à mai dito
63Quando che l’à sentìo tocar sta corda.
Qua le prego de unir el primo Edito
Del Comun col segondo che gh’ò leto
66Per veder come in questi do’ sta scrito.
Nel primo solamente el s’à ristreto
Ne la Cità e in Rialto, e in sto segondo
69L’à voludo el Dogado anca interdeto.
Le ghe bisega un poco sin al fondo
De sta Parte, e le veda, se ghe par
72Sto ponto del Dogado s’el sia tondo.
Su sto ponto no gh’è da dubitar,
Per quanto intendo debolmente, quando
75No se vogia nel torbido pescar.
Voràve anca saver chi à dà ’l comando
Che in Rialto e in Cità fosse proibii
78Sti aquisti e sti possessi, e chi à da ’l bando
Del Dogado in sta Parte ai Loghi Pii;
Cioè chi mai sia stà quelo ch’à proibido
81Che da nove possessi i sia investii?
A convincerme in questo mi lo sfido,
Perchè a fronte de la so’ testa e scienza,
84E vasta cognizion, mi me ne rido.
Co le intende sto ponto, de presenza
Le vederà chi sia el Legislator,
87E chi dà su ste cose la sentenza:
Solo el Mazor Consegio xe l’Autor
De ste do’ Legi, nel qual sol risiede
90Tuto el so gran poter nel so’ vigor.
Mi so che sto prencipio el me concede,
Perchè se ’l pretendesse qua d’esporse,
93Dirìa, che no ’l intende o che ’l stravede;
Nè ch’el me staga a meter pur in forse
Sto ponto in un Governo Aristocratico,
96Perchè segno sarìa, che no l’à corse
Le Legi del diverso sistematico
Ordene dei Governi, e co ’l confonde
99Le parti con el tuto l’è un fanatico.
Ma senza che in questo me difonda,
A quel Decreto del mile seicento
102E cinque, adesso un poco lu risponda;
E de perder sta causa son contento!
- Note a cura de Bartolommeo Gamba
- ↑ Si allude alla Parte del M.C. 1533