Alla Copia Corally

by Pietro Buratti

3 Alla Copia Corally Pietro Buratti primi del 1800 XIX Canzonete

Indice:Collezione delle migliori opere scritte in dialetto veneziano 8.djvu

Pietro Buratti

Alla Copia Corally

primi del 1800

Edission original:	Collezione delle migliori opere scritte in dialetto veneziano, Volume ottavo: Poesie di Pietro Buratti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 8.djvu

Edission e fonte ▼

CANZONCINA

ALLA COPIA CORALLY

CHE BALLAVA
NEL TEATRO DELLA FENICE

Copia bela, che ti stuzzeghi
     Tanti inzegni del Parnaso,
     De sti versi al son vernacolo
     4Storzerastu forsi el naso?
Inalzarme al grado lirico
     Perchè mai vorogio ancuo?
     Perchè mai levarme el merito
     8De Poeta da paluo?
Se sol dir che fazza fritole
     Chi xe nato fritoler;
     Guai per chi se mete in gringola
     12De cambiar el so mistier!
Tropo noti, tropo celebri
     Xe quei cigni che à cantà
     De quei do gargati armonici
     16La rival melifluità,¹

Provocai da un dolce stimolo
     Sublimar i so pensieri
     In sto incontro, che miracolo!
     20S'à fin visto i boteghieri.
S'à fin visto i Primogeniti,
     Zovenoti senza pelo,
     Anunziarse co sto titolo
     24Per poeti da cartelo.
Contrastar co sti bei spiriti
     Mi no vogio la corona,
     Son oselo de sti grebani
     28Fazzo versi a la carlona.
No me taco a nomi rancidi
     Per lodar sta balerina,
     Me desmentego Tersicore;
     32La batizo per divina.
Me desmentego de Zefiro
     Co lo vogio lodar lu;
     Digo el bala come un anzolo,
     36E me par de dir de più.
Trovo in ela un certo morbido
     Che xe novo su ste scene,
     E capisso co la esamino
     40La rason de ste gran piene,
Bela, cara, inarivabile
     Co in elmeto la vedè,
     Co la mostra a tuto el publico
     44In camisa el so bombè.

Se slongar podesse l'indice
     Pagherìa mezo milion....
     Ve lò dito, no son lirico
     48Perdonème sta espression,
Ogni sera mando al diavolo
     Quele brute damigele
     Che ga pressa de coverzerghe
     52Forme a l'ochio cussì bele!
Quante grazie co magnifica
     La fa pompa de beltà,
     Superando la so imagine
     56Che la imita e perde el fià.²
Ma co in mezo al palco scenico
     La vien fora con quel scial,³
     Tiro i ochi, vado in estasi,
     60Stago là come un cooal.
Quela gara vicendevole
     Me colpisse, me inamora,
     De sta vita lo considero
     64El più caro quarto d'ora.
Se mi fusse Primogenito
     Vorìa farghe un bel Soneto,
     Ma de casa nato l'ultimo
     68A sto azardo no me meto.

---

Note a cura de Bartolommeo Gamba (1817)

1. La Malanotti Contralto,
   La Manfredini Soprano.
2. La Corally si vestiva ad uno specchio simulato ed un'altra dietro il telo, che figurava lo specchio, ripeteva gli stessi movimenti della Corally mantenendo così l'illusione.
3. Bellissimo pas de deux col scial.