A l'Esposizion de Venezia - Dove?...
|
Edission original: |
Gino Cucchetti, Spiere de Sol!, Roma, Tipografia Elzeviriana, 1905 |
|
Fonte: |
| ← A l'Esposizion de Venezia - Beethoven | Edission e fonte ▼ | A l'Esposizion de Venezia - El castigo → |
A L'ESPOSIZION DE VENEZIA
(Ano 1901).
DOVE?...
Ghe xe chi che la ciama una sciarada
e queli che la crede alegoria,
chi ghe dise legenda ben spiegada,
4chi un quadro pien de vita e poesia...
Uno trova la tinta esagerada,
st'altro inveçe la trova ben spartia,
chi la trova una tela indovinada
8e chi (pardon!) la pezo porcaria!
Mi..., per dir la mia povara opinion,
visto che atorno ghe xe tanto mar,
11tante onde e po' tanta confusion,
Ve dirò che do sposi a mi i me par,
dai cavei tropo rissi e tropo biondi,
14che a furia de sognar... andarà a fondi!!