A 'na Madoneta
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← A 'Lio | Edission e fonte ▼ | L'ombrela a... → |
XI.
A 'NA MADONETA
Ela xe tanto bela, Signorina,
Che chi la varda inamorar la fa;
La gà un museto bianco, e 'na bochina
Che la par un garofolo sbocià:
Oh, se la fusse mia! Sera e matina
Con devozion, per tera inzenocià,
Dirghe vorave 'na salveregina
Che la gavesse del mio cuor pietà.
Ela xe tanto cara e tanto bona
Che la starave ben sora n'altar;
La ghe somegia tuta a la Madona...
Se fusse un prete, ghe vorave dar
Anca l'inçenso, e dirghe 'na corona...
La xe proprio 'na santa da adorar!