- 20.
El soçialismo, go desmentegà!
Oh che bela teoria!: gnente paroni!
Dove mai trovarè mati o zuconi
che vògia lavorar inverno e està?
Patáte, formenton, fasiòi, meloni
da so posta la tera ne darà;
tuto el resto le macchine farà,
da la polenta a tacár i botoni.
Benon! Sia stabilio solo un livélo;
gnanca più un povareto; tuti siori...:
oh! per viver cussì no ocor çervelo;
anzi questo el dev'esser abolio,
se no, chi pensa vol tuto per lori
e 'l socialismo, alora, xe finio.
- 21.
Se vero scopo xe del socialista
redúr la vita manco infame e dura
garantindoghe 'l pan a la creatura
che sgóba, so' anca mi de quela lista.
Chi, dal gnente, richezze e onori aquista
co' l'industria i comerçi e agricoltura,
dei povareti el deve tiórse cura,
se no, i ghe dirà perfido, egoista.
E i fortunai ch'eredita milioni
ga stradópio dovér; prima per lori
e po' in sufragio dei so póari noni;
perchè — da Adamo in quà — sti gran signori,
prima de Conti, zà i xe stai... baroni,
e i ghe n'ha fato de tuti i colori.
