- 18.
Oh, queli sì lavora co' un pensiero
solo! I parla, e i divoti ghe va adrio;
i li crede ispirai dal vero Dio,
paroni — come lu — del mondo intiero.
Gh'è chi a far da so posta xe restio;
e no i capisse che un çervelo vero
su le so idee non çede mai l'impero,
come ghe toca a l'omo incocalío.
«O con mi o contro mi» ve intima i santi
falsi, e la religion tióga de mêzo...
De quella guera, barbari xe i efeti,
sia contro vivi, morti o agonizzanti...;
e i trova chi li agiuta: ecolo el pèzo,
che gh'è preti più preti anca dei preti!
- 19.
Queli de cesa pur no i se somegia
tuti quanti; ghe xe tante ecezion:
la suora; el missionario; el prete bon
che socóre ogni póvara famegia,
conforta i amalai; al ben consegia
l'ozioso, el barufante, l'imbriagon;
l'indúse 'l ladro a far restituzion
e parla sccéto al popolo e a la régia.
Cò se tratava de la libertà,
anca el prete, da vero patrioto,
coi altri la so vita el ga risccià.
Dio, la patria e 'l so prossimo servendo
de tuto cuor, sia l'áteo ch'el divoto
xe giusto che i lo ciama «reverendo»