- 22.
Oh, l'aristocrazia xe una parola
che la ve sgionfa la boca e la testa,
ma — strúca, strúca ― tanto poco resta...!;
e a qualchidún ghe basta e 'l se consola.
E pur la voría dir 'na cossa sola:
supremazia de la virtù modesta,
de studio e de creanza; questa, questa
xe l'aristocrazia che in alto svola.
Rango e nássita, ormai, no conta un boro,
se insieme no ghe va fior de çervelo;
resta un áseno sempre anca quel d'oro.
A sti ciari de luna le distanze
fa da rider: el massimo livelo
ancuò lo dà l'inzegno e le finanze.
- 23.
Quanti nomi me passa per la mente
de ómeni grandi e veri nobiloni!...:
Leopardi, Alfieri, Mamiani, Capponi,
Sclopis, d'Azelio...; e po', no digo guente
de Cavour...: basta el nome! E de la zente
d'un picolo Ducato zà paroni,
principi arditi e galantomenoni
che in nobiltà nissun Re ghe va arente?
Quà l'aristocrazia ga un posto degno!:
cuor, testa e brazzo un più de l'altro forte
a far de tanti stati un solo regno.
Queli — sfidando e patimenti e morte
pur che l'Italia vada proprio a segno —
de Roma eterna i ga' verto le porte.
