Vustu vegnir co mi?
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← La mama no vol | Edission e fonte ▼ | Le xe tute adulazion → |
Nina, xe l'alba..., svègite!...
Xe un'ora che son qua...
Vien zo, ma no far strepito
Se no i te sentirà!
Andemo, andemo..., cocola,
Fa presto e no tremar...
La nona xe co i anzoli,
No la se pol svegiar!...
Col tendalin la gondola
Go parecià per ti...
Tesoro mio, rispòndime:
Vustu vegnir co mi?...
Vustu montar?... Deçidite!
Qua ghe xe un nìo d’amor!...
No sospirar.., consòlite...,
Pùsite sul mio cuor!
Qua, se ti vol, pacifica
Ti tornarà a dormir!...
Ti podarà ne l'èstasi
El sogno tuo finir!...
Col tendalin la gondola
Go parecià per ti...
Tesoro mio rispòndime:
Vustu vegnir co mi?...
Sentistu... L'onda ciacola...,
Par che la diga: ― Zo!...
Mi vogio al Lido vèderve
A brazzo tuti do! ―
Nina, xe ciaro!... Vedistu?
El sol xe per spuntar!...
Varda: no gh'è una nuvola
E xe tranquilo el mar!
Col tendalin la gondola
Go parecià per ti...
Tesoro mio, rispòndime:
Vustu vegnir co mi?...
- Note
- ↑ Musicata dal maestro G. Zàngerle di Venezia, accolta e premiata con medaglia d'argento al primo Concorso indetto pel 1895 dalla Filarmonica Società Giuseppe Verdi di Venezia.
Anche il Barone comm. Aumiller la onorò della sua bella musica eseguitasi al teatro Malibran la sera del 19 Luglio 1895.