Venezia ne l'istà de l'ano 1845
|
Edission original: |
Luigi Plet, Versi di Luigi Plet, da lui corretti e dati in luce di nuovo, per poter sostenere la sua gratuita scuola di canto, Venezia, P. Naratovich, 1857 |
|
Fonte: |
| Edission e fonte ▼ |
Me consolo! Venezia par l'idolo
Deventada de tuta l'Europa —
Capitai, se pol dir, qua da ogn'angolo,
4Ne le cale i foresti se ingropa.
Per artisti, per richi, per nobili
El vegnirla a trovar xe de moda;
I palazzi, le chiese magnifiche
8Tuti quanti ghe osserva, ghe loda.
Tuti esalta el so clima balsamico,
La so fresca e tranquila laguna
Che la sera i vol gòder in gondola,
12O sul molo, co' s'alza la luna.
Per virtù dei so bagni in gran credito,
Spezialmente in sti mesi de fogo,
No catè a le locande una camara;
16Impegnà xe fin l'ultimo logo.
Sta cità ben l'onor vede e l'utile
Che sto imenso concorso ghe porta;
E, quantunque la vechia Republica
20Quasi da cinquant'ani sia morta,
Generosi progeti, idee splendide
Se ghe forma, ghe bulega in mente
Anca adesso, dovendo tanti ospiti
24Acetar e tratar degnamente.
E, perchè i se diverta, la prèpara
Vari freschi, una gran serenata,
Una iluminazion, una tombola;
28Finalmente una bela regata. —
Che regata? (dirà el senex querulus,
Declamando dei so dì passai
Un elogio prolisso con enfasi),
32Che regata ancùo porla dar mai?! —
Se sa ben che sto patrio spetacolo
No pol esser, ai tempi presenti,
Quanto el gera pomposo, incantevole,
36Co' se usava el capèlo a tre venti,
E Venezia lo dava a quei prencipi
Che, anca da lontanissimi stati,
Ghe vegniva qualche ano a far visita,
40Co' zirava i zechini e i ducati.
Ma egualmente se sa che, in sto genere,
No ghe xe gnanca ancùo el so secondo:
E che ancora Venezia xe l'unica
44Che lo possa vantar a sto mondo. —
Se conosce per causa primaria
Del so efeto, el splendor de la scena:
Sto Canal, de magnifiche fabriche
48Fianchegià da preziosa caena. —
Sto Canal che, per strana abitudine,
Imitando anca nu el popolazzo,
Xe, co' improprio e sprezzante vocabolo,
52Da nualtri chiamà Canalazzo;
Coi so punti de vista mirabili;
Maestoso cussì, cussì belo,
Dove mai, forestieri! disèmelo,
56Dove porlo temer un fradelo? —
Xe mo qua che, arivada al so termine
De le snele barchete la giostra,
De la festa la parte più magica
60In maniere infinite se mostra.
Ma de barche l'imensa faragine,
De grandezza diverse e de forma,
Che va su, che vien zo e se moltiplica,
64Che simbolichi fregi trasforma,
Qua intrigae che a fadiga se scambia,
E là sciolte che va de gran voga,
Perchè l'aqua al momento xe libera,
68Nè le vol ch'altre el primo ghe toga;
Certi grupi curiosi e variabili,
Che sorprende e che el caso dispone;
La richezza, el bon gusto, el fantastico
72Ne l'adobo de vinti bissone;
El diverso e bizaro vestiario
De quei tanti che adopara el remo,
E dal spenzer a gara de anema,
76Scalmanai, sudai tuti vedemo;
E la fola incantada de popolo,
Su le rive stivada a gran gropi;
Su i balconi strucada e sui pergoli;
80E perfin rampegada sui copi,
Me dà un quadro a copiarse impossibile,
O che almanco a copiar mi no basto;
Che anzi, essendo l'impegno trop'arduo,
84Co' una pena cativa mi guasto.
Za se, per sto sogeto, xe languida
Del più bravo pitor la taolozza,
Manco assae pol valer la retorica
88Che parole meschine ve acozza.
Dunque adesso mi, fin che continua
Fra i palazzi sto splendido corso,
Cercarò le rason che giustifica
92Qua de tanti foresti el concorso. —
Se parlè de la zente che studia,
Qua el pitor cata quadri ecelenti;
El scultor, l'architeto, in gran numero
96E diversi de stil, monumenti.
Se parlè dei più richi, dificile
Che trovar lori possa, mi credo,
Come qua tutti quanti i so comodi
100Nei do estremi del caldo e del fredo.
Qua, de inverno, li chiama, a proposito,
Anca quel carneval cussì mato,
Cussì alegro, del qual fin la musica
104Ga volesto tentar el ritrato.
Gera l'ogio, una volta, del véderghe
Ne le ore de note, la base;
Ancùo invece, col gas, qua se ilumina
108Le contrade, i negozi, le case1.
Qua ogni dì se governa, se fabrica;
A gran passi va avanti la Diga;
Qua co' un ponte che sta per averzerse
112A la tera Venezia se liga2. —
A Milan se andarà come el fulmine
Co' quel mezo che, un secolo in drio,
Chi l'avesse proposto, a San Servolo
116Gavarave i so zorni finio. —
Qua se pensa al comercio sul serio:
A far, no solamente ch'el viva,
Ma ch'el possa mostrar magior spirito,
120Se no tuta la forza nativa.
Qua se vol anca aver un telegrafo
De portarne capace da Viena,
Da Parigi, per mezo d'un fluido,
124Un aviso pressante dà apena3. —
No la vol comparir stazionaria
Quando tanto el progresso galopa;
E per questo Venezia par l'idolo
128Deventada de tutta l'Europa.
- Note