Sopra l'acqua indormenzada

by Pietro Pagello

3 Sopra l'acqua indormenzada Pietro Pagello Reynaldo Hahn (1901) 1834 XIX Canzonete

Indice:Poesie veneziane scelte e illustrate da Raffaello Barbiera, Firenze, Barbèra, 1886.pdf

Pietro Pagello

Sopra l'acqua indormenzada

musicà da Reynaldo Hahn (1901)

1834

Edission original:	Poesie veneziane scelte e illustrate, a cura de Raffaello Barbiera, Firenze, Barbèra, 1886
Fonte:	Indice:Poesie veneziane scelte e illustrate da Raffaello Barbiera, Firenze, Barbèra, 1886.pdf

Edission e fonte ▼

A GIORGIO SAND.

     Coi pensieri malinconici
No te star a tormentar:
Vien co mi, montemo in gondola,
Andaremo fora in mar.
     Passaremo i porti e l'isole
Che circonda la cità:
El sol more, senza nuvole
E la luna spuntarà.
     Oh! che festa, oh! che spetacolo,
Che presenta sta laguna,

Quando tuto xe silenzio,
Quando sluse in ciel la luna;
     E spandendo i cavei morbidi
Sora l'acqua indormenzada,¹
La se spechia, la se cocola²
Come dona inamorada!
     Tira zo quel velo e scòndite,³
Che la vedo comparir!
Se l'ariva a descoverzarte⁴
La se pol ingelosir!
     Sta baveta, che te zogola⁵
Fra i caveli imbovolai,⁶
No xe turbia⁷ da la polvere
De le rode⁸ e dei cavai.
     Sto remeto che ne dondola
Insordirne no se sente,
Come i schiochi de le scurie,⁹
Come i urli de la zente.
     Se in conchiglia i Greci Venere
Se sognava un altro dì,
Forse visto i aveva in gondola
Una zogia¹⁰ come ti.
     Ti xe bela, ti xe zovene,
Ti xe fresca come un fior,
Vien per tuti le so' lagreme:
Ridi adesso, e fa l'amor!

---

Note

1. Addormentata.
2. Si vezzeggia.
3. Nasconditi.
4. Scoprirti.
5. Questa auretta che ti giocherella.
6. Arricciati, crespi.
7. Intorbidata.
8. Ruote.
9. Come lo schioccare delle fruste.
10. Un gioiello.