Soneti in dialeto venezian/Parole de l'editor
|
Edission original: | |
|
Fonte: |
| Edission e fonte ▼ | Amor! coss'è sta roba, cossa xelo → |
Sti pochi soneti, scriti da un Patrizio venezian nel dialeto del só paese, mostra no solamente el talento poetico de l'autor, ma sì ben el bon cuor e la bona moral. Credo che tuti i Veneziani ghe farà bela ciera: parlo dei veri Veneziani, che no se vergogna de esserlo, e no gà desmentegà afato un dialeto, che dopo el toscan, per giudizio dei doti, xè el più rico e grazioso de quanti se ghe ne parla in Italia. Vegno adesso a responder a una censura che forse qualchedun poderà far a sto libro; vogio dir de trovar da per tuto barcarioi, o frase e figure tolte da quel mestier. E respondo disendo, che i poeti no interessa mai tanto quanto có i depenze i costumi del só paese in quelo che i gà de più singolar. Fin che parlemo de nobili e de richi, poco sù poco zó i xè tuti sempre e dapertuto de un tagio: ma có vegnimo alla zente che se guadagna el pan co le só fadighe; che xè in necessità de meter in mostra per longo e per largo tuto quelo che i sà e che i pol far; che conserva intato e, dirò quasi, grezo el caratere natural; allora xè che podemo giudicar de l'indole e dei costumi de questa e de st'altra nazion. Ghe ne xè un'altra da dir: che sicome i lenguazi, cussì anca i dialeti i xè quasi el reverbero dei gusti, dei bisogni, e de le inclinazion particolari del popolo che li parla. E per conseguenza el popolo venezian, nato, per cussì dir, in mar, e avezzo a viver del mar, gà frase e figure in abondanza, tolte da sto elemento, e da chi esercita l'arte del mariner e del pescaor. Credo de poder dir francamente, che i barcarioi xè la porzion più poetica del popolo venezian. E chi gà scorso i nostri canali, se no adesso, almanco pochi ani fa, e gà sentìo al chiaro de luna i versi del Tasso e le prodezze dei Paladini cantae dai nostri gondolieri, sarà certo i primi a darme rason. No ve stupì dunque, letori, se sentì tanto spesso el nostro poeta cantar de barche e de barcarioi; e assicureve che la zente de mar, che xè stada la prima a portar el nome de Veneziani, sarà anca l'ultima per conseguenza a desmeterlo.