Siè cantè sora la villa/Cantà V
|
Edission original: |
Siè cantè sora la villa, colla zonta d'altre composizioni sora el Vendri Gnoccolaro de Verona, Verona, Dionigi Ramanzini, 1784 |
|
Fonte: |
| ← Cantà IV | Edission e fonte ▼ | Cantà VI → |
MUsa, prevezo che i te faga drè
Le battarelle, quando che i te senta
A sdottorar su i studj, e su i slitrè,
Col cervel pien de gnocchi, e de polenta;
Onde guarda pur ben quel che te fè,
Perchè l'è un tempo adesso che se stenta
A poderse salvar dai forbesoni,
Ch'altro che de tagiar no i è mai boni.
In fatti a dirla vezo che me metto
A un gran cimento, ma son zà in impegno
St'opera de finir su sto suggetto;
Che i diga quel che i vol, basta che 'l legno
I tegna a Cà, e le man, per altro aspetto
Delle gran bagie, e quarche bel inzegno
O dritto, o storto me cizorarà,
Ma quarcun altro me defendarà.
Perchè mi no pretendo de voler
Dar leze a tanti che sà pì de mi;
I sà che no l'è mai stà el me mester
El studio, e la svertù; ma vezarì
Che quel che digo, e ch'ho nel me penser
De rebatro, no l'è gnente de pì
De quel che giudicar pol n'ognoranto;
Che la Villa al studiar pol zovar tanto.
Prima perchè s'è for dai strepitoni
Che stornisce la testa; e pò perchè
Chigo no ghè Restoteli, e Pratoni,
Che faga nar le cosse a cul in drè:
Gne manco chigo gh'è quei forbesoni,
Che dà del naso a tutto quel che fè,
E i hà zurà de no voler sti scaltri
Compatir, gne lodar la robba d'altri.
Massimamente se i sà che la sia
Megiora della soa como succede
Pì de na volta, perchè sta genìa
No avendo da Cristian leze, ne fede,
Stà impregnità i hà sempro iniqua, e ria
De vivro e de parlar como che i crede,
E cisorar, e scalcagnar chi scrive,
Da bon Cristian, e mei de lori vive.
Ho bu sentì che tante volte i manda
La dottrina pì bona, e pì cristiana
Con certe mercanzie che ven da Olanda,
In tempo che da tutti la pì sana
L'è cognossua, ma lago da na banda
Adesso el torme da pionar sta piana
Piena de groppi, e contraici, e dura,
E che hà bosogno de mazor fegura.
Torna pur, Musa, donca in carezà,
La Villa è for dei strepiti, e però
Chi vol studiar chigo 'l commodo ghà
De far quanto ghe piase el fatto sò,
Studiar magari tutta la zornà
Senza stufarse, chigo su, e zò
Per le contrè criando no se sente:
Scarpe, pena, careghe, e conza brente.
Ose tutte che smorba la Città,
E che rompe la testa a chi hà n'impegno
De appricar quarche cossa, e che ghe fà
Dar i piè in terra, e no pol star a segno:
Chigo de fora in pase e in carità
Gode la quiete, e questo è un logo degno
Per appricar e far quel che se vol,
Gnente desturba, e negun ve destol.
Anzi se se ghe stracca un po la testa
El leva su, che 'l vada un po de fora
Che 'l se volta da quella e pò da questa
Banda per tutto el se solleva, e sora;
Oltra de che la fantasia ghe resta
Pregna de quella vista che innamora,
E ghe mette del brio, vigor, e lena,
E ghe fà piover subito la vena.
Catulo in fatti, e popo el Fracastoro
Homenazzi, e Poeti tutti du,
De sto Paeso principal decoro,
Desime un po a studiar donve che i fu?
Verzilio e tanti del seculo d'oro
La Villa tutti a scrivro i hà elezù,
Perchè chigo la mente no zavaria
Col benefizio della quiete, e l'aria.
Chigo ghè n'altra cossa che me piase
Che 'l studio l'è pì sodo, e chi no gh'è
Tanti Maestri a dirla in bona pase,
Che pretende saerde pì piassè
Dei nostri boni vecchj, e con ste rase
I dà da intendro cose strambalè,
Col voler che un Puttel che fà la stà
Deventa in du tri anni un gran slitrà.
Perchè dighio mo questo? perchè in fatti
Quan ven l'autuno, è che ven fora a spasso
Quarche Scolar de questi pien de flatti,
Nol dise na parola, nol sa un passo
Che nol se mostra de razza de matti,
Stenco che un legno, e duro como un sasso
El stà, gne saludar negun se degna
E questo è 'l primo moto che i ghe insegna.
No fradelarse con negun, gne mai
Parlar cossa che i studia, gne resposta
Dar a negun, per altro sai no sai
No se pol recavar, credo che a posta
Stà gravità i ghe insegna, azzò i boccai
Udi no se scoverza, o se ghe mosta
I ovi che i coa: che se se ghe domanda
Per no respondro i volta a n'altra banda.
Che se'l nostro Bonsior per so capricio
Urta de domandarghe a mezza via
Cossa che i studia, e ghe sporze l'officio
Perchè i lo leza, mo in concenzia mia
Millio strambotti i dise a precepizio,
E pur el và a studiar Filosofia,
O Retolica almanco, e in sta maniera
L'Aseno ven a Cà como che l'era.
El Maestro de Villa hà n'altra parte,
El libro sempro in man i vol che i tegna,
E i leza adasio senza tante carte
Voltar innanzi, e quel che ancò 'l ghe insegna,
Ghe insegna anca doman, così con st'arte
El campo a poco a poco el desgramegna,
E con pacienza tante zucche in fine
El le fà deventar teste bronzine
Ma in Città con la moda benedetta
De sti Maestri, agn'un per parer bon
Ficca innanzi i putei, ghe dà na stretta
Con libri novi, e Dio sà se 'l carton
I cognosse gnancora, e a dirla schietta
Anca el Maestro a far la spiegazion
Se no l'avesse un tradutor in man,
No sò se 'narea sor de sto pantan.
Che i vegna chigo un po dai nostri Pretti
A sentir como i spiega qual se sia
Libro, como i smenuzza ai puteletti
La Gramatica, e como che i và via
Bel bello; che sibben i è poeretti
I ghe và con le bone, e se i ghe cria
Quando i falla na volta, la seconda
Per dina i ghe la catta netta, e tonda.
Se quarcuno dei nostri và in Città
A scola, e và a imparar Filosofia;
El lomo dei Filosofi impará,
In t'un anno l'avea: chi 'l crederia!
L'altr'anno delle sfere infarinà,
De conti, de paesi, e notomia,
E far quattro scrimagi col compasso,
E pò deventar matto, o nar a spasso.
Cossa pol mai zovar saver de Stelle,
De pianeti, Felomeni, e de segni
A un Prette a n'Avocato se sù quelle
No ghè 'l so pan? e cossa è 'l far desegni
D'architetura a un medegho? che belle
Scienze queste se lomina? che impegni
A un Confessoro pol vegnir? perchè
Sappa l'anima in l'Homo donve l'è.
Questa è la moda che in Città se fente
Dei Maestri moderni e con sta rasa
In quatt'anni un putel no impara gnente,
E forse l'era mei che 'l stasse a casa;
E pò pretenderà sta brava zente
Anor, e donve i pesta che se basa:
Millianta slaudi i dà, millianta vanti
A Uttori Panimbrodi, como ai Santi.
Che nò che chì de fora sti sporchezzi
De' libri no se lassa in telle man
De' zovenetti gnancor ben avezzi
A cognosser un sasso via dal pan,
E pò col tempo, e che con pochi bezzi
Se và destrando al genio el tramontan,
Se 'l Maestro dei tristi la dottrina
Esalta, el putto in tanto se infarina.
Passemo avanti che chigo bosogna
Taser, e resta ancor da dirve como
In Villa no gh'è quella pesta, e rogna
De voler forbesar el galantomo
Che scrive quel che 'l sà senza vergogna;
E suggecion, e ven via col so lomo,
Credendo de dir ben, ma all'improviso
N'anonemo ghe dà sul muso un sfriso.
Mo perchè vegnìo via, cari Fradei,
A correger chi falla immascarè?
Perchè no vegnìo via da boni, e bei
A dirghe: galantomo me fallè:
Perchè el possa cognosser alman quei
Che lo avertisce, a dirghe gramarei;
Ma perchè chi corregge, no se sappa
Che l'è invidioso el fà da bullo, e scappa.
Un darà sora un tomo de moral,
De istoria, o scriverà quarche punion,
O sarà quattro versi o ben, o mal,
Subito taggia adosso el cizoron
Al poeromo, e i lo depenze un boccal,
Perchè là tolto na interpretacion
In fallo, o pur el logo, l'anno, el lomo,
E dell'aseno chiappa el poeromo.
Chigo spesso, se mette pò in impegno
Chi comanda, remedio de cattarghe,
Perchè no nassa da sto zelo indegno
Ingarbugiar, o strenzer, o far larghe
Le conscienze, e negun catta pì el segno
Della vera dottrina, altri ten carghe
Arme da fogo, e senza descrezion
Sbarra per un contro na Lerigion.
Perchè 'l contrasto, e la costion no è pì,
Como la devarea, studiosa guerra,
Ma d'un cor invidioso, inviperì
Maligno effetto, che rason tra in terra,
E fà como fà quei che vedarì
Rugnir, morder, e trar quando i li serra;
La guerra tante volte no è fenìa,
Che salta fora un scisma, e na resia.
Che però ve dirò, che chì de sora
Agnun studia a so modo, gne paura
S'ha de ste male lengue che cizora,
Se dis con libertà, gne sminiaura
Se da al Vanzelo, gne s'onze, e s'indora
Con quinci, e quindi, gne 'l se desfigura,
Ma como i nostri Preti a chi ha marletta
La camisa, alla bona se ghe netta.
Cos'è sto predicar ancò alla moda,
Como s'usa, e se predica in Città?
Che i vada col so studio, e che i sel goda,
E che i toga su 'l frutto che i sarà,
Anzi co i so pastizi, e la so broda
Invece de nettar i sporcarà,
Arte è questa inventà da Belzebù,
Che sà metter la coa donve 'l vol lù.
Da donve ven sto mal? se no da quella
Malenaza ambizion, che guasta tutto,
D'esser slaudè: basta che la faella
I comeda al parlar nefando, e brutto
Dei Folesteri, ma per Diana stella
El linguazo cristian che pol far frutto
No i lo vol imparar; col quinci, e quindi
I vol far zente, e in te la borsa dindi.
Dei Vanzeli così la verità
Se no i stramuda, almanco i la laora,
E a so modo i stirazza, anzi i ghe dà
Na certa spiegazion che è vegnua fora
Da quella scola, o setta no se sà;
E un boccon oriental così i ve indora,
Che quando l'havì in corpo el ve sconvolze,
E invece d'indrizzarve, el ve stravolze.
Verbo grazia i dirà, S. Marco hà scritto
Che no bosogna far, o pur far questo,
Cossì S. Paulo gran Dottor ha ditto,
E così i Santi Padri, e i porta un testo
Che no se sà, sel sia roverso, o dritto,
Se 'l sia a so logo; ma mi ve protesto
Che no bosogna che negun se fida
De quel che i dise perchè tutto è a guida.
Pora sempricità! se la se imbatte
In sta sorta de zente che ha concetto
D'esser pì vertuosa, i ghe da un latte
Intosegà, finzendo tegner stretto
El Vanzelo, i lo mola, e po i rebatte
El chiò con certe massime che in petto
Ve fà tegner secrete, ma in sta forma
Nè sotto el confalon d'una reforma.
E Dio volesse pur che quel che digo
Fusse busia: ma in fatti in le Cittè
Se sente in volta sempre e chigo, e ligo
Punioni, e controversie de slitrè:
Che se vegnesse quei del tempo antigo,
I direa, che i Vanzeli è stramudè,
E la stradda del Ciel no l'è pì quella,
Che insegnè Gesù Cristo e bona, e bella.
In tanto su sto esempio anca el Villan
Sente dei virtuosi la punion,
E an lu se và tolendo bon in man
La leze de voltar sul so galon,
El studio de Città così pian pian
Scomenza a far in questi operazion,
E capinando drè al Patron, che è zoppo,
Và verso al precipizio de galoppo.
Per esempio el Patron ficarà in testa
Al so laorento che se pol anar
A far i so interessi in dì de festa
Per vanzar tempo al dì de laorar,
E così d'insegnarghe anca nol resta
Como el possa le decime stronzar,
Cosí a no far limosina el ghe insegna,
E ghe petta de posta la so tegna.
Sora certe facende ancò se fà
Un tananai, na guerra tanto granda
In le Cittè, che adesso no se sà
Pì cossa far, no se sà da che banda
Tegnerse; chi se morde, e chi se trà,
Chi se lava la scuffia, chi se manda...
E intanto che sti brai se sgrafa el muso
No se sà cossa far, gnente è concruso.
E questo studio se dirà che 'l sia
Utilo al mondo? e pur questo l'è quel
Che in le Cittè se mette ancò alla via
Con tanta voga, e fà tanto bordel;
Che bottega no gh'è, gne libraria
Che no parla de critica, e 'l cervel
Mette tanto a partì, che l'è pì bona
Dei libri per salvarse la corona.
Sicchè l'è vera, e vel confermarò
Che in Villa no gh'è mai sta baronada
Agnun dise alla bona el fatto sò
Senza paura de nar for de strada,
Perchè se ten la strada vecchia: e pò
Chigo no se camina a fil de spada,
Gne s'ha tante dottrine per el cao
Gne gh'è quell'ambizion d'esser pì brao.
Finalmente a che serve sto studiar
La critica, e tor su sta bella usanza
De nar sui manuscritti a recercar
Col microscopio un ponto, na mudanza
De na parola! e se i la catta el par
Che i catta un mondo novo, ma in sustanza
Se fà per restampar, e darla fora,
E doperar in fin la so cisora.
Ma i tagia d'ordinario sora el morto,
Perchè nol pol pi dir la so rason
No so se a quarchedun ghe sarea storto
Un pel se 'l fusse vivo; e 'l forbeson
No so se 'l tagiaria de dritto, e storto
De tanti e tanti sora la punion;
E quarchedun per far na bella calma.
Tagia dei altri la pì bella palma.
Voi finir anca questa, e lagar lì,
Che se voles dir tutto ve farìa
Na canta longa alman per quindes dì,
Tanto da dirghe sora ghe sarìa
Contra sto cizorar, ma me dirì
Che a bon conto per agni stamparìa
La và ben, fà facende, e in sta maniera
Se indrizza i storti. Basta: Bonasera.
.jpg)