Secondo Dialogo/Scena undicesima

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
← Scena decima Edission e fonte ▼ Scena dodicesima  →
SCENA UNDICESIMA
BILORA solo

BILORA  Al sangue del mal de la zopa, le me va tutte pure ala roessa. Mo... cassí... ch'a 'l roesso elo co le scarpe in su. Ah... cassí, ch'a 'l faghe insmerdare da riso, ch'a ghe faghe lagare i zòcoli e la bereta chivelò. Agno muò che vuògio fare? A son deruinò, ch'a n'he dela vita. L'è miegio ch'a 'l faghe fuora e che a m'in cave i piè. Tamentre supiando sí arabiò a no vorae che la no me butasse ben. Tamentrena a sè ben zò che a m'he pensò. Con vega che 'l vegne de fato fuora, a ghe borirò adosso de fato, e sí a ghe menarè su le gambe, e elo cairà in tera de fato e ala bela prima, e man zó per adosso, per longo e per traerso. Gran fato ch'a no ghe faghe borír gi uogi e la vita. Poh, sí! Meh, sí! l'harà paura se a fago a sto muò. E po a faelerè da soldò spagnaruolo che i sonerà pí d'oto. L'è miegio ch'a proa un può a che muò a farè. Orbentena, a cavarè fuora la cortela. Làgame veere se la luse. Càncaro, la n'è tropo lusente. El n'harà tropo paura. E po a meto — verbo grazia — che questo cotale supie elo, e mi supie mi, Bilora, che sa ben menare quando el vuole. E sí a scomenzerè a biastemare e a catare quanti Cristelèisone è in Pava, e de la Manubiata e il Domenesteche. Pota chi te inzenderò e de quel zodío, vecio sgureguzo maleeto, che te puostu aravare. Con a saràve mè bon adesso te vuò cavare el reore dal culo. E mena, e dài, tanto che l'harò amazò, e po a ghe caverè la gonela e sí a ghe la torè mi, e sí a 'l despogierè da un lò e l'altro mi... e man a gambe, e man via coranto. E sí a 'l lagherè chialòndena stravacò a muò un gran boazón. E sí a venderè po la tabara mi, e sí me comprerè un cavalo mi, e sí a me farè un soldò mi, e sí andarè in campo: agno muò a he puoca volontè de star a cà. Moà, a me conzerè chivelòndena mi. A vorae che 'l vegnisse fuora mi. A no vorae che 'l stesse pí. Tasí. Vènlo? Elo vegnú fuora? Sí. Oh càncaro te magne vecio strassinò... Pota de Críbele, mo on èlo? A no èlo gnan vegnú? Mo he ben guagnò mo. Guarda che 'l no ghe vegne pí. Tasí... Ala fè me sona ch'a 'l senta vegnire. El ven, sí. A no me gh'arciaperè pí. Faze ch'a no ghe vuò borire adosso insina ch'el n'ha serà l'usso.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Secondo_Dialogo/Scena_undicesima&oldid=56614"