Se fusse un rossignol
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← El balo de l'impianton | Edission e fonte ▼ | I xe fati per amar → |
SE FUSSE UN ROSSIGNOL
Se fusse un rossignol
A furia de cantar,
Prima che spunta el sol,
Te vegnaria a svegiar!..
Svolando su 'l to sen
Dove se sconde Amor
Te contaria, mio ben,
Le pene de sto cuor!...
Mi, co la mia canzon,
Te vegnaràve a dir
Che da la gran passion
Per ti... vorìa morir!...
Più che te so lontan...,
Più ti me xe in pensier!...
Da la montagna al pian
Svolar vorìa lezier
In çerca d'un giardin
Dove ghe fusse el fior
Che par veludo fin
E sa parlarte al cuor!
Da fido rossignol,
Vegnindote a svegiar,
Prima che spunta el sol
Te lo vorìa portar!...