Poesie veneziane del conte Francesco Cestari/Alla marchesa Teresa Archetti Cauzzi. Anacreontica
|
1819
|
|
Edission original: |
Francesco Cestari, Poesie veneziane del conte Francesco Cestari, dedicate alla nobile donna la signora marchesa Teresa Archetti Cauzzi, Venezia, Alvisopoli, 1819 |
|
Fonte: |
| ← Marchesa | Edission e fonte ▼ | No vado, no, ben mio → |
A sto mondo xe i confronti
Quei che fa gustar le cosse:
Belo, e ben, ne saría sconti
Se i so' oposti no ghe fosse.
Perchè esiste de l'amaro
A Nu el dolce fa piacer:
Perchè avanti xe sta al chiaro
Pena al scuro el prigionier.
Co xe caldo se godemo
L'aria fresca respirar:
La salute valutemo
Co' amalai ne toca star;
Mì in adesso no podendo
Secondar el genio mio,1
A Treviso star dovendo
Fin che inverno sia fenio,
Penso sempre al bel momento
Che a Cremona m'ò trovà
Per acrescerme el tormento
Che mi go restando qua;
Da Filosofo xe 'l conto:
Più che adesso sofrirò,
Magior ben da sto confronto
Nel vederve provarò.
- Note