Nana. Ma perchè? Coss'altro te galo fato?
Piero. La senta, siora Nana, bisogna che la nota..
Pina. El ghe tende ale capeline, el se le fa vegnir a botega, el vol farghe le scarpete d'oro...
Piero. Ma no la ghe bada, xe vegnuda una foresta che gnanca no conosseva...
Pina. No, no xe vero. Lo go visto mi co i mi oci a farghe i stomeghessi, a ofrirghe la roba mia, e burlarse de mi...
Piero. Ti ti xe una bela busiara...
Pina. E ti un bruto finton...
Nana. Oh ma Signor del Paradiso, mi no capisso più gnente. Me gavè fato una testa che me par un balon... Per carità quieteve una s'cianta che in strada no i creda che sè drio per massarve...
Pina. Ma mi lo masso dassèno quel can d'un birbante...
Piero. E mi ghe cavo la schissa a quela sprotona..
Nana. Ma tasè, ve go dito, e finila perdiana! Se torna qua staltro el fa un sconquasso de tuti!
Pina. No importa! Go caro ch'el vegna, cussì ghe dirò che razza de omo...
Piero. E anca mi vogio dirghe che genere de fia..
Nana. Tasè, ch'el xe qua!
(Infatti s'ode la voce di Zaneto che si avvi-
