COSE DA FORCA!
“Se te gh’è proprio fame, bastardasso,
Marcia in giro a çercar la carità:
Ma tegni a mente, sta lontan de quà
Se no vien bessi, parchè mi te masso!„
Fora l'è un fredo can, gh'è tuto giasso;
La gente ingrotolida e imbacucà
La va de longo e in tuta la çità
No i ghe dà un scheo par quanto el slonga el brasso.
L’è fortunado assè se mai de sera
El torna a casa con de i rosegoti47
E qualche cica ch’el tol su da tera.
E dopo d’essar stado vagabondo
El g'à in cambio de i pugni e de i cassoti
Da quele bestie che l’à messo al mondo!
