Dove xe quela testina
Cussì bionda e rizzolada,
Che trovava ogni matina
Co’ me gera desmissiada?
Dove xelo quel viseto
Fresco come un gelsomin
Che vedeva a piè del leto
Rampegarse a pian pianin?
Dove xeli quei do ocieti,
Quela boca cussì bela,
Quei sestini, quei zigheti,
Quela vose dove xela?
No xe qua in sta camareta
Dime, amor, che ti saltavi?
No xe qua su sta toleta
Che fin gieri ti zogavi?
No xe qua in sta cocetina
Tuta nova e a lustrofin,
Amor mio, che la testina
Ti pusavi sul cussin?
Che se intorno tuto quanto
Xe l’istesso co fa gieri,
Come mai de ti, amor santo,
S’à da dir che ti ghe geri?
Come mai? Ma no, mi spero
Che ti dormi e che ti tasi;
Che ti vogi, no xe vero?
Che te svegia coi mii basi,
E mi vegno, levo suso,
Varda, vegno, son alzada;
No, no rider se me puso,
Sarò un poco indormenzada.
