Se carneval el fusse un galantomo
El vegnerìa tre quatro volte a l'ano;
Ma carnevale non l'è bon da gnente,
El vien ’na volta a l'ano malamente.
Vedelo là, vedèlo là ch'el vien,
Un da la Piaza e l'altro da San Zen:
Quel da la Piaza el me porta le fiore,
Quel da San Zen l'è el mio caro amore.
Sètu cossa m'à dito l'ortolana?
Che la salata la rinfresca el cuore,
Massimamente quando la se magna
In compagnia co lo so caro amore.
Se quel che passa fusse lo impicao,
Come se pica lo basalicò:
E el basalicò se pica in sen,
Così fusse picà anca el mio ben.
Te vè digando che son picinina,
Che no ghe rivo la boca a basarti,
Se no t'el credi mèteme a la prova,
Se no ghe' rivo un'altra amante trova.
Felize ci à la dona picinina,
Che par el leto i la fà zugolare:
I la fà zugolar sera e matina,
Felize ci à la dona picinina.
