Duro cuor, e salvadega, ria vogia,
In dolce, cara, bella, alta fegura,
S'il pesoco dolor, e passion dura,
Besognerà in zipon, che me despoia.
Che quando muor qualch'un' caze una fogia,
Hora è di chiaro, hora fa notte scura,
Pianzo d'haver perduto la mia ventura,
Con Amor, e Madonna, che me sogia.
De speranza mi zibo tristolando,
E von in mar, e si ho rotta la pruova,
Onde chiamo secorso, e nigun alde.
No ne turco crudel, che lagremando
Butao in zenocchion, che no se muova,
Ma lie si ride, e del mio mal si galde.
Cho vedo la mia Donna dal dolcezza,
E tremo, e suo, e pianzo, e me l'arido,
Fagandoghe cho i occhi de revido
Saltando, e schitotando d'allegrezza.
Cho fon lontan vegno in tanta tristezza,
Cho fese per Enea Madonna Dido,
Pien de suspiri de nigun m'infido,
Tanto son spento, e ponto da gramezza.
Quando vegnimo può su i parlamenti,
E che tornemo alle nostre zanzete,
E'l par c'habbia confeto sotto i denti.
La me fa un puoco arsar su le molete
Avanti che se vegna su i franzenti,
Cusì intravien a chi non na scarpete.
