E ho pianzesto, adesso canto, e ballo,
E d'allegrezza e spuo, che fazzo un fiume,
Daspuo che Giove m'ha dao del so lume;
Cavandome de si cattivo fallo,
M'haveva fatto adosso el vicio un callo,
Fuora del mio antigo, e bon costume;
Tal che per strada, o in le ociose piume,
El senso la rason feva intervalo.
Me trovo piu lizier, cha pena, o pagia;
Tanto son descargao de una gran soma,
Che me tigniva tutto impaltanao.
Quei che vedeva, me deva la bagia,
Co si fosse un balon senza fiao;
Pur son tornao, co i dise in rima a Roma.
Un zorno me voi meter la zornea,
E rasonar tutte le mìe rason,
E zapar in tel viso co un zapon,
A chi è senza creanza fango, e chrea.
Medusa è questa, anzi crudel Medea,
Che me tratta da un mello, e da un melon,
E me da un poro in man, per un piron,
Perche ne la mia Idea la tegna Dea,
E si la fronto, ghe voi dir sul fronte
Ingrata sta pur drento le to grote,
Che no vogio to fiabe, che me fiuba.
E certo in la mia mente ho fatto un monte;
E atorno 'l cuor una cheba concuba,
Si ch'al mio pesce, le to rete è rote.
