LA SPISIMA
Quel San Bortolo tanto celebrà
Che se amira nel domo de Milan,
Quel da la pele scortegada in man,
Me par assae più in carne e ben tressà
De sto classico avanzo pompejan
Che tontonando1 bagola qua e là,
Ingrizzolio, col capelin fracà,
E i zampini insacai nel palandran.
Tremando el parla in ciave de violin,
Tirando 'l colo come fa el polame
Che becola per tera el sarasin.
A sto naso filà, pien de catrame,
A sto lemo,2 a sta ciera d’Ugolin,
Ghe perde l'apetito anca la Fame.
