LA MORETINA
La mia moreta la xe andada al bagno
Fra l'alghe de la vasca militar,
E za co le manine e 'l bel calcagno
Da un ponto a l'altro la desmissia el mar.
Come un pesse levà fora dal stagno,
Che a l'aria averta no pol più fiadar,
Resto fiapo, isolà sora sto scagno,
A fumar spagnoleti e sospirar.
Ma se cavo le fogie a sto bel fior,
Se ponto el canocial a la mia stela,
O se tasto l’oracolo d’Amor,
Sento che i dise che son qua per ela;
E come mi la porto sempre in cuor,
Culia son certo, la me ga in scarsela.
