EL SBRAGION.
Su che i te mazza, toco de frascona,
Ghe ne vol tante a darme una candela?
Diese volte ò sonà la campanela;
Vustu, cagna da Dio, che me spolmona?
Dove xelo quel bieco de fanela
Che m’à scaldà gersera la parona?
La camisa de note dove xela?
Movete, via, petazza buscarona!
Xe un'ora che te ciamo e che t'aspeto,
Xe un’ora che me sbrego de criar:
No sastu, sporca, che go mal de peto?
Guai se me salta, sa, la mosca al naso....
Ma xe Pasqua, e me devo confessar:
Per questo ingioto, compatisso.... e taso!
