EL ZERBINOTO
Core su e zoso un figurin stampela
Col museto de rana,
La riga in mezo e le bandete in suso;
In golarina rossa,
Le braghete pistacio e un capotin
Che no passa el fiancheto balarin.
Rizzandose i barbisi o la moscheta
E sberlefando come una simieta
El va farghe d'ocieto a quela e questa
Più in gringola d'un can vestio da festa.
Ma no se dà spetacolo più belo
Che a vederlo montar la cavalina,
Co 'l va sul Corso a spassizar bel belo,
O a far a Sant’Andrea la trotadina,
E tegnindose al pomo de la sela
La figura el ve fa de Purcinela.
