Pagina:Rime in dialetto veneto di Polifemo Acca.djvu/30

Da Wikisource
Sta pagina la xe stà trascrita, ma la gà ancora da vegner rileta.


     La scufia in testa e la traversa al fianco,
Piena de ciave come un carcerier,
La va in cantina, la ve sta drio 'l banco,
La furega ne l’orto e nel graner;
E per tenderghe megio al so interesse
La mete su i mustaci e le braghesse.

     Se da un vecio schenal de pano zalo
La ve fa saltar fora un veladon,
E i dindi che la ciapa de regalo
La li mete in comercio de scondon,
Capirè che a poderla praticar
Ghe sarave del belo da imparar.

     L’impresta soldi al sedese per cento
Tolendo in pegno anei de matrimonio,
Possae, recini e tatare d’argento,
Reliquie de San Marco e Sant’Antonio;
E fufignando1 megio che la pol,
La dà ponti a l’avaro e al strazzarol.

     Ma co se zuna2 e co se bate 'l peto,
E se ciapa ogni dì la santa messa,
Co se ghe manda al papa l'oboleto
E i strucoli de pomi a la badessa,
Basta pagarghe al portiner el goto,
Che s'entra in paradiso a scopeloto.

  1. Frodando.
  2. Digiuna.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/30&oldid=71062"