Pagina:Raccolta di poesie in dialetto veneziano 1845.djvu/464

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


XV.


L'ore prime del dì me piase assae,
     Perchè tuto me mostra atività,
     Vigor de vita, bona volontà,
     4L'industria che spassizza le contrae.

No vedo le boteghe popolae
     Da tanta zente oziosa che sta là,
     Come scolari de Università,
     8A imparar fiabe a rechie spalancae.

No sento come a l'ore de la sera
     L'urlo del popolazzo imbriagon,
     11O i canti de sirena lusinghiera;

No vedo omeni e done a sbordelon,
     Ma invece qualchedun con fede vera
     14Che se fa el segno de la Redenzion.


CANZONETE.


LA VICINANZA.


Co son qualche volta
     Vicin de culia,
     Che mi chiamo mia,
     4Che el cuor m'à robà,
Me par d'esser fora
     De tuti i mii guai,
     Nè d'esser stà mai
     8Me par sfortunà.
La vardo, e me incanto,
     Ghe parlo, e me godo,
     Nè invidio sul sodo
     12L'onor de un sovran.
Ma po se ghe strenzo
     La man in secreto,
     Me par un dileto
     16De aver più che uman.

EL RICORDO.


Sia benedeto el zorno
     Che mi t'ò visto, o Nina,
     E che de mi vicina
     4Cara ti t'à sentà.
Me lo ricordo ancora,
     Sempre me par, ben mio,
     Che no sia mai spario
     8Quel benedeto dì.
Ti geri ben vestia,
     Vestia come da festa,
     E ti gavevi in testa
     12Un bocolo d'amor;
Ma in sen come sul trono
     Te stava quel fioreto,
     Che simbolo xe schieto
     16De la semplicità.
Quel zensamin, Nineta,
     Vardandolo m'à dito;
     No stago qua in sto sito
     20Senza el mio gran perchè.
La Nina m'à prescielto
     Fra mile e mile fiori,
     Perchè mi più de lori
     24Somegio al so bel cuor.



CONCLUSION.


Vedeu sto omeneto
     Grassoto, tarmà,
     Canuo, franco, schieto?
     4L'è un vechio soldà.
Vedeu qua sto tomo,
     Che fa el cortesan?
     Lu xe un zentilomo,
     8L'è un bon venezian.
Vedeu sta persona
     De tanto morbin,
     Che vive a la bona,
     12Maturlo un tantin?
Vedeu sto celenza
     Poeta ogni dì?
     Con vostra licenza,
     16Paroni, son mi.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/464&oldid=59444"