Ti donca, te suplico,
Gran ostro tremeddo,
Da far che in le sponde,
Quel legno da l'onde
Sia ben sculazzà;
E ch'Euro te segnita,
Sbregando, slanzando,
E gomene e cai,
E remi e costrai
A torzio sul mar;
Nè bora teribile
(Che spianta noghere)
No 'l staga debando,
Ma el vada supiando
Fin quanto che 'l pol;
Nè mai stele lucide
Che staga a far chiaro;
Ma sempre che dura
L'orenda negrura
Che porta zo Orion;
In soma desidero,
Che ti abi quel Viazo,
Quel orido vento,
Quel mar, quel spavento,
Che Ajace à provà
(Per via de quel ordine,
Co siora Cassandra
Sucesso in tel tempio,
Co pessimo esempio...
Lassemola là....
Che za po da Palade,
E lu, e i so compagni
Da Troja scampai,
In mar consolai
I è stai come va!)
Oh come che i strussia
Quei to marineri!
E ti, se no falo,
Ti tremi, e ti è zalo
Co fa el zafaran;
Che cighi da femena,
Che preghi mai fastu?
Za Giove sta volta
Per gnente te ascolta.
Contrario el te xe.
El mar ruza e strepita,
El scogio te aspeta,
Barufa fa i venti,
La nave a mumenti
L'è là per andar.
Ah! quando certissimo
Sarò, che sul lido;
(Facendo cucagna)
I smerghi te magna,
Dirò: beato mi!
E al dio sora i turbini
Faro la mia oferta,
Za che a mio giudizio
L'è stà un gran servizio
De farte negar!
Darò in sacrifizio,
Unito a un'agnela,
El più lusurioso
Cavron sozzoloso,
Che possa trovar.
.jpg)
