Penso de no voler mai più pensar
A cosse che me daga dispiacer,
E fermo penso de mai più voler,
Per quanto mai suceda, disparar.
Voi divertirme, bever e magnar,
Voi sempre rider, sempre voi goder,
Ne in altro doparar vogio el pensier
Che in cercar gusti novi d'imparar.
Cussì son certo de mai più sentir
Nissunissima sorte de dolor
Su quel che nasce e quel che pol vegnir...
Ma rifletendo ben su sto tenor;
Podarogio in sta impresa riuscir?
Dubito se no cambio e testa e cuor.
Dove trovar qua zo in sta tera Pase?
Cossa vol dir son bon, a tuti Piaso,
Go campagne, go fabriche, go Case,
Ancuo vesto vigogna, e doman Raso?
Se quando manco penso, e che in mi Tase
El sospeto, el timor, oh dio, che Caso!
Vedo con mio dolor a tera Rase
Cinquanta case in t'un supiar de Naso.
El fogo a san Marcuola xe Vegnuo,
E fa che tanti grami no Vorave
Esser al mondo certo al dì d'Ancuo.
Se gavesse da dir, per mi Dirave,
Che no vorave gnanca esser Nassuo,
O se nato, esser porai o peri o Rave.
.jpg)
