Se a perder mai ti fussi un dì costreto
(Un amigo mio caro me domanda)
O la vista o l'udito, da che banda
Scielgeressistu el mal, caro Beneto?
Senza pensarghe su gnanca un pocheto:
La vista, digo, xe una cossa granda,
Perche l'è quela che ogni tanto manda
Nove delizie al cuor, novo dileto.
Merita pur l'udito esser stimà,
Ch'anca per quelo el cuor dei gusti sente,
Ma l'ochio xe da tuti più aprezza.
Go risposto cussì bonariamente;
Ma adesso che la Todi m'a cantà
Stimo l'udito più infinitamente.
Chi podesse pesar su la balanza
Tuti i afeti umani e le passion,
E tegnir una esata anotazion
Dei gradi de dolor e d'esultanza,
Vedarave che sempre i primi avanza
In peso, in forza e in continuazion;
E che pesa del mal più l'opinion
De quelo che ogni ben pesa in sostanza.
Se, per esempio, ve sovrasta un dano,
Che realizzà ve ridurave a morte,
Ma che se sfanta e rende el timor vano,
L'e un gran piacer, xe vero, una gran sorte,
Ma col confronto del soferto afano
No gh'e comparazion, xe el mal più forte.
Voleu saver come se fa a tradir?
Bramaressi mazzar vostro sior pare?
Odiar voressi vostra siora mare
Senza che mai v'avessi da pentir?
Veder voleu come se fa a morir
Per no più soportar vicende amare?
Inclinaressi a far che da le bare
L'ombre le so razon vegnisse a dir?
Amaressi formar una congiura
Contro uno al qual gavessi obligazion?
Ve insegnarò la strada più sicura:
A la tragedia andè. Tuta Sta union
De cosse che fa fremer la natura
La xe d'ogni tragedia e 'l belo e 'n bon.
Se el Rabi da chi studia xe stimà
Per dir in cento modi una parola,
Xe certo che assae più meritarà
Chi ghe ne dise cento in una sola;
E se chi studia a quelo xe obligà,
Sta scienza nova ga da far più gola,
Perchè con questa certo el trovarà
La brevità che piase e che consola.
Se per esempio volè dir Simon
Grasso, gregugna, grossolan, astuto,
Superbo, mato, traditor, bufon,
Bevagno, crapulon, bestia da Struto,
Dotor busiaro, putanier, poltron,
Disè Simon che avarè dito tuto.
