Se trovava in Bassan
Un omo morbinoso e cortesan
Che aveva el naso estremamente grando,
Che a quanti lo vedea
5Maravegia grandissima el facea.
Un dì, che caminando
L'andava per cità
Un dotor l'à incontrà
A caval d'una mula, che fermada
10In mezzo de la strada
No volea caminar
Per quanto che 'l dotor tentasse far.
Onde, cussì scherzando,
Ga dito el morbinoso (recordandose
15De aver el naso grando)
Seu vu, dotor, o xe la mula, a caso,
Che se fazza paura del mio naso?
El dotor gera anch'elo
De bizzaro cervelo,
20E risposto imediate el ga cussì:
Credo infati esser mi
Quelo che s'à ispaurio,
Che me sento un prurito in tel da drio.
L'omo che vol scherzar
25Anca lu deve el scherzo tolerar.
In un certo casin de compagnia
Una ventosità bela e sonora
Ga trato una signora.
E sicome diversi l'à sentia,
5Ghe xe vegnù, ch'è natural, sul viso
Do rossi a l'improviso;
Ma suponendo de poder far creder
Che fusse stà el strissar del careghin,
Che la gera sentada, e no el martin
10Che à sonà la trombeta,
La andava via movendose,
Strissando el careghin, malizioseta.
Ma morbinoso el cavalier servente,
Che ghe gera d'arente,
15Ga dito: la pol far
Cussì quanto ghe par,
Ma mai la arivarà
A far come che prima fato l'à,
E à savesto la cossa in sta maniera
20Anca quei che inacorti no se gera.
Per voler ocultar certe cossete
Più in vista le se mete.
Un zovene una volta se trovava
In palazzo a san Marco, dove i fava
El placito d'un tal che avea scanada
Un'infelice dona sfortunada,
5E come ne la calca de la zente
Se trova anca dei ladri, da prudente
L'à assicurà i relogi, avendo messe
Le do caene drento in le braghesse;
E stando co le man ne le scarsele
10De la velada, custodiva in quele
Do fazzoleti, un bianco, un de color,
E ascoltava tranquilo l'orator.
Un putazzo, che a lu gera vicin,
Ga dito verso un altro: saveu quanti
15In sta sala birbanti
Vien per robar i fazzoleti, e fin
Anca i relogi; e stassela pur là,
L'altro risposto ga:
Ma tanti anca ghe xe che vien a far
20Baronae d'altro andar:
A un signor, giusto geri,
No so se vu ghe geri;
I ga tagià la coa
Longa sie bone quarte, e tuta soa,
25Che no ve digo gnente
Quanto l'era furente!
El zovene, sentio sto tal raconto,
Che anch'elo avea una coa de qualche conto,
Per poderse salvar anca da questo,
