Pagina:Raccolta di poesie in dialetto veneziano 1845.djvu/286

Da Wikisource
Sta pagina la xe stà trascrita, ma la gà ancora da vegner rileta.

     E a darme la stangheta
     La s'à volsù provar:
Varda quel sol, la dise,
     Co belo ch'el vien fora,
     E come che l'indora
     L'acqua col so splendor!
Come ch'el venteselo
     Va l'aria rinfrescando,
     Come se va increspando
     Placidamente el mar!
Ma mi, che come brase
     Tuto de drento ardeva;
     Penseve se gaveva
     Più vogia de vardar.
Ti, ti xe el sol, rispondo,
     Per mi, nè gh'è altri soli;
     O che ti me consoli,
     O vedime a morir.
Pietosa quei ochieti
     Verso de mi la move,
     £ sento che me piove
     Mile dolcezze in sen.
La man ghe strenzo alora,
     La bela me risponde,
     Le idee se me confonde,
     Più no me trovo in mi.
De st'estasi beata
     Chi podaria parlarve?
     Coss'ogio da contarve
     Se in mi no gera più?
So che svegià m'ò visto
     Sentà co la mia bela;
     E Amor sentà con ela,
     Ma mezzo indormenzà.



EL PENSIER


Vado pensando, nonola,
     Quelo che amor facesse
     Quando ch'el te vedesse:
     4No xelo un bel pensier?
Mi ghe scometarave
     Ch'el restaria incantà;
     E che dopo el dirave:
     8Sta dona ghe xe qua?

Cussì el dirave, nonola,
     E po dopo a bel belo
     Quel mato de putelo
     12Te vegnaria a basar
Prima la man, po un brazzo,
     E po el faria un sestin,
     E po dopo el furbazzo
     16A pian, a pian pianin,
L'andaria rampegandose
     Più in su, più in suso ancora
     Disendo: la inamora
     20Custia l'istesso amor.
E nol staria più quieto,
     Come i puteli fa,
     El chiaparia un ochieto,
     24La boca: e po chi sa?
E ti po disgustandote
     Ti lo manazzaressi:
     Putelo, ti diressi,
     28Sta quieto, via sii bon.
E lu, come i putei,
     Mezzo mortificà,
     In quei to bei cavei
     32Tuto quanto imbautà,
Parlandote, pianzendote,
     Tanti sesti el faria,
     Chie alfin te sentiria
     36Dirghe: vien qua baron.
Alora, co quel sesto
     Che pol aver colù,
     Svolando presto presto
     40Ora zozo, ora su,
L'andaria cocolandote:
     E ti ti ridaressi,
     E ti deventaressi
     44Più bela assae de lu.
Ma mi deventio mato?
     Amor l'à da vardar?
     No xelo chi t'à fato?
     48Questo xe zavariar.
Ah sì, son mato, nonola,
     E pur tropo lo vedo:
     Figurite, che credo
     52Che ti me vogi ben.
E pur te pregaria,
     Cara, benchè sia tal,
     Lassarme in sta busia;
     56Za no la te fa mal.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/286&oldid=68134"