Terminà le so imprese, el fio d'Alcmena
Lassa 'l scorzo mortal e svola sa.
Per far la corte a Giove a boca piena
4Ghe sbragia i numi: Pare sana a nu?
Gavarave Giunon voltà la schena,
Ma de necessità la fa virtù:
La ghe la sporze un tantinin a pena
8La man, e gnente gnente po de più.
Marte ghe bota proprio i brazzi al colo;
Ghe fa Mercurio un bel complimenton;
11Ghe spifara un soneto el biondo Apolo;
E Venere ghe dise in t'un canton:
«Sul far de l'alba vien da mi, ma solo,
14Che voi che ti me sbati el zavagion.
Pien de consolazion
Per tante cortesie l'à ringrazià
17Una per una le divinità.
Ma co s'à presentà
Pluto, el famoso dio de l'oro, el qual,
20Per non eceder nel cerimonial,
Co un cefo d'animal
Ghe schizza l'ochio, dreto come un fuso,
23Ercole squasi ga spuà sol muso.
Pensandoghe po suso
El s'à voltà, per no guastar la festa,
26E xe andà 'l spuo su l'andriè de Vesta;
Ma per questo no resta
Che barba Giove, che no varda a caso,
29No gh'abia visto andar la mosca al naso;
Anzi dandoghe un baso,
El ga dito: fio mio, ti senza falo
32Col dio de l'oro ti à chiapà el cavalo:
T'alo sapà sa un calo?
Eh no, papa! ma co vedo quel sior,
35Xe proprio vero, se me ingrinta el cuor,
Me da su el mal umor:
L'ò visto in tera, in tanti incontri e tanti,
38Protetor squasi sempre dei birbanti.
1Al Cairo, circa setant'ani fa,
Kalù bizaro, prodigo bassà
D'una de quele coe che val per tre,
À fato un dì chiamar per el lachè
El so prete de casa, un bon dervì,
Savio, prudente, e 'l g'ha dito cussì:
«Belchù, varda sta gema: te dirò
Per chi l'ha da servir. Za de ti go
Prove che basta: tiola donca su,
La deposito in man de la virtù.
2Queste xe borse piene d'oro. Va,
Zira l'Asia, l'Europa, le cità,
Le vile, i borghi, le mosche, i cafè,
E pesa le pazzie quante le xe;
E co ti trovi un che te par a ti
El mato più solene de sti dì,
Faghe a l'uso oriental un prostinò,
Metighe in deo l'anelo, e dighe: tiò,
Questo è 'l tributo del bassà Kalù;
E in quatr'ani te aspeto. Adio Belchù.»
3Belchù tol su l'anelo e 'l so casnà,
El se mete a viazar, e presto el sa
Che, da mezzo milion batendo tre,
Dei mati al mondo, graziadio, ghe n'è;
Cervei bislachi senza ti nè mi,
Logiche gravi de chichirichì,
Teste che fuma tre fia cinque do,
Spiriti incoronai de qui pro quo;
E gh'è per tuto inzegni a cul in su
Che crede el noi sinonimo del tu.
4Tra i vovi a corbe de l'umanità
A scielger mo te voi! come se fa?
Se mentre sora d'un la man portè,
Un più belo e più grosso ghe ne ochiè.
Belchù studia, confronta, invoca Alì.
Ma cossa serve se nol sa po a chi
Consegnar quel anelo? a San Malò
L'aveva trovà un tomo... e squasi... oibò
(Ghe dise el cuor) a Roma, o in Calicù
Ghe n'è forsi un più mato de costù.
5Sempre in dubio el dervì, mortificà,
Tuta l'Asia e l'Europa l'ha zirà;
