Stufo de corer l'etere
Frustando la canicola,
Verso l'ocaso rodola
Mete i so ragi in manega,
5Spica el sol una tombola,
Che lo sprofonda in mar.
La note, che al so solito
Ghe sta alle coste in mascara,
Spalanca la so nuvola,
10Sbrufa qua e là 'l calisene,
E fa in bota i crepuscoli
Stranuando scampar.
Da le celesti natole
Che ghe dà 'l dì ricovero,
15A schiapi scavalcandose
Scampa le stele in gringola,
Come sol far le piegore
Su l'alba da l'ovil.
Le sbusa in ciel le tenebre,
20E le criela candida
Luse de perle e d'opale
Su l'emisfero atonito.
Gode la tera in estasi
La pompa signoril.
25Per farla più magnifica,
Lenta la luna, tacita,
Da l'orizonte alzandose,
Sporze quel globo magico,
Dove l'arzento sfiamega
30In nitido crestal.
I rusceleti limpidi,
Che vien dal monte in copia;
Porta qua e là co boria
Quela brilante imagine:
35I par barbini o codeghe,
Che core col feral.
Là un furianelo scapolo
Scovola i pini, i roveri,
Dà la cazza a le notole,
40Rompe i sogni a le lodole,
E fa le catorigole
Tra i carpani al fasan.
Qua un zefireto placido
Pisola sul garofolo,
45Basa la viola e 'l bocolo,
Sbrissa fra 'l timo e 'l ditamo,
De fragranza aromatica
Semena 'l cole e 'l pian.
Tornada là dal pascolo
50Dorme la gregia. Titiro,
Cenando a pie d'un platano
Coi resti de Pitagora,
Fa i prindesi a le Najadi,
Che a Baco far nol pol.
55E mentre el sazia l'otica
Dei noturni fenomeni,
Da la cima d'un alboro,
Per le rechie, su l'anima,
Etereo miel ghe sgiozzola
60Cantando un russignol.
Crome granite, sferiche,
Traversa l'aria libere,
E l'eco filarmonico,
Racolte apena, identiche
65Dala colina, in biscolo,
Ghe le rimanda là.
Assorto in quela musica
Dolce, vivace o flebile,
A poco a poco Titiro
70Scorda le imposte civiche,
El formenton in cenere,
L'oca che i ga robà.
«Fonti, ruscelli, tortore,
Deh! per pietà fermatevi:
75Dite se un nume o un satiro
Fra queste piante ombrifere
La mia diletta Fillide,
L'idolo mio celò! — »
Late coi lavri supega
80El bambin da le fragole,
E co le rechie Titiro
Chiuchia da st'aria 'l netare,
Ma 'l russignol va in sincope
Sul trilo del rondò. —
85— Oh Dio! perchè te fermistu?
«Bon (lu risponde) sentile;
Croà croà... capissistu?
Ste rane senza equivoco
Dise che stono: Titiro,
90Cedo a la so virtù. —
