Pagina:Raccolta di poesie in dialetto veneziano 1845.djvu/209

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.

Nova stizza li ponze, li stuzzega,
     Più feroci i lioni se lacera;
     À durà quela zufa teribile
     Più de quele de Achile con Etore,
     Perchè Venere, Marte e Netun
     No i ga tolto el partio de nissun.
Tanti sforzi ogni forza ghe anichila,
     Su le gambe che trema i se biscola,
     Ansa i fianchi, dal sgrogno ai garetoli
     Sangue vivo ghe spruzza, ghe pissola;
     Resta in tera, tra bava e suor,
     Denti e sgrinfe, trofei del furor.
Trabalando, sbrissando i se rampega
     Da quel'acqua a cercar refrigerio:
     Ma che? mentre a la barba dei posteri
     Stava i mati strazzandose i didimi,
     S'à quel'acqua a so logo incassà....
     El sol gh'arde el respiro.... i mor là.


L'AVA E 'L PAVEGIO.


Za l'aurora per i campi
     Dà la cazza al lusariol;
     Za da l'onde tra i so lampi,
     4Scampa e ride el novo sol.
Dise a l'ave la regina:
     «Pute care, adio, bon pro!
     Che fragranza a la colina!
     8A revederse a filò.»
Va la fola industriosa
     Sora i gigli, su i gimè,
     E chi al timo e chi a la rosa,
     12Come andemo nu al cafè.
Ma nu spesso, povereti,
     Rei veleni a sorsegiar;
     Senza spesa nè sospeti,
     16Ela 'l netare a chiuchiar.
Stava giusto un'ava un zorno
     S'un garofolo in zardin;
     Supeghandoghe d'intorno
     20A sorseti el coresin.
Su quatr'ale tricolori
     Un pavegio bel esprì

     Passa in quel che a mile fiori
     24Dà de naso tuto 'l dì.
El la vede far biancheto
     Sul garofolo co 'l va,
     E co 'l torna dal boscheto
     28El la trova ancora là:
«Ma bisogna (el dise), cara,
     Che siè propio de bon cuor,
     Che costanza! l'è ben rara!
     32Chiuchiar sempre sempre un fior!
Parè un'ostrega incrostada
     Su la croda in mezo al mar,
     Che no sa trovar la strada
     36De poderse destacar. —
— Bel emblema dei galanti
     (La risponde) avè rason;
     L'ava e l'ostrega costanti
     40Ze un perfeto paragon;
Questa e quela serve atente
     Al so nobile destin,
     E chi è nato a no far gnente
     44Nasa fiori per morbin!»
Ste delizie podè averle
     Vu che ozioso ve fa 'l ciel,
     Ma da l'ostrega el vol perle;
     48E da mi la cera e el miel.


EL TIMO E L'EDERA.


Diseva al timo l'edera
     Su l'alba sta mativa:
     «Povera piantesina,
     Piu che te vardo, viscere,
     Più ti me fa pecà;
Ti, e to fradelo ditamo,
     Ve alzè una quarta apena,
     Destirè pur la schena,
     Ma galinete pepole,
     Dovè cufarve là;
Almanco mi, col rovere,
     Pianta dileta a Giove,
     Vado, saveu fin dove?
     A stafilar le nuvole
     Che sporca el viso al ciel. —

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/209&oldid=71448"