Pagina:Raccolta di poesie in dialetto veneziano 1845.djvu/178

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


XCIX


Che i to Cavei m'à incaenà su, e ben streto,
     Ti 'l conossi anca ti, per questo nua
     De compassion, per quanto pena e sua,
     4De bagolo te servo e de zogheto.

Ma el tempo che a nissun porta respeto,
     Passa, e passando tuto el scambia e 'l mua,
     E ti te vedarà tuta canua
     8Deventar presto a marzo to despeto.

Umile e mansueta alora ti
     Ti vegnarà a cercar quela pietà
     11Che adesso cerco, e ti ti nieghi a mi;

E mi superbo e altiero te dirò,
     Senza gnanca vardarte: Xe passà
     14Quel tempo Enea che Dido a te pensò.



C


Per acquistarme fursi gloria un dì,
     Nina, sti versi no i go scriti, no:
     Ma de far restar solo tentà go
     4Eterne al mondo le to Drezze, e ti.

Quanto ò podesto ò certo fato mi,
     Se ghe sia po riussìo mi no 'l dirò;
     Gradissi almanco el tentativo, e po
     8No me resta a bramar più de cussì.

E d'averme anca massa guadagnà,
     E più che no me merito, otegnù,
     11Te zuro, Nina, che me parerà,

Se, lezendoli, mossa da pietà
     Ti arivi a dir 'na volta, e gnente più:
     14Ti ga molto, meschin, per mi penà!


EPISTOLA A LIDIA119


Lidia no star a credere
     Che in tuto l'universo
     Ghe sia felice un'anima,
     4Perchè l'è tempo perso.
Ricerca pur, esamina
     Le condizion i stati,
     Osserva richi, poveri,
     8Muneghe, preti, e frati:
Chi ga el livelo picolo,
     Chi povera la cura,
     Chi scarsa la limosina,
     12Chi streta la clausura.
Chi l'avarizia domina,
     Chi 'l fasto e l'albasìa,
     Chi invidia, gola, colera,
     16E tuti la pazzia.
Nè creder che i filosofi
     Sia a megio condizion,
     Che la virtù i sa fingere,
     20Ma i sente l'ambizion.
Anzi se go da dirtela,
     Secondo el mio pensar,
     Lori vol esser l'idolo,
     24E la virtù l'altar.
Osserva là Diogene
     Co la so bote arente
     Che afeta d'esser povero,
     28Per viver da indolente.
E 'l rigido Zenocrate
     Dirastu che sta ben,
     Se de la vita el balsemo
     32L'à convertio in velen?
Forsi Epicuro incredulo
     Merita la to stima?
     Ah! quel to franco ridere
     36Dise de no a la prima.
Cossa te par de Socrate,
     Che ne la Grecia tuta
     L'è andà a cercar la femena
     40La più cativa e bruta?
Forsi da sto filosofo
     Te par che sarà giusto
     De tor la vera regola
     44Per viver de ben gusto?

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Raccolta_di_poesie_in_dialetto_veneziano_1845.djvu/178&oldid=70126"