DI
GIOVANNI POZZOBON
DETTO
SCHIESON DA TREVISO.
El par che sto mio stil facile el sia,
E che scriva le rime come che
Le me vien su la pena. La falè
4Se credè questo; sè anzi in eresia,
Che ghe xe el so dificile per dia;
Molto più assae de quel che suponè.
Proveve mo anca vu; e vedarè
8Se verità mi digo opur busìa;
E se mo sto mio verso è natural,
Andante, e che no par gnente pensà,
11Provo molta fadiga a farlo tal.
A far facile la dificoltà
Bisogna aver in zuca un po' de sal,
14E lo giudica quei che ghe ne sà.
Cara Catina mia, son insognà
Una cossa che a dirla me vergogno,
Son insognà (ma al fin l'è sta po un sogno)
4Che mi con vu me gera maridà.
Ma l'uno e l'altro gera desparà
Per aver fato sto grosso codogno.
Da una banda gavevimo el bisogno,
8E da quel'altra la necessità.
Scontenti, malinconici, afamai,
Ogni dì sempre più l'andava mal;
11Mocolavimo come renegai.
E senza bezzi e senza capital,
Pieni de cuche, de miserie e guai
14Alfin semo redoti a l'ospeal.
Se sto sogno bestial
El se verificasse, che nol so,
17Starassimo pur freschi tuti do!
