Pagina:Poeti antichi del dialetto veneziano 2.djvu/82

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.


I à infin le ciere tanto consumae
     Che i par de quele aneme che al fogo
     Soto de nu da Dio vien condanae.
Tiogo de pato entrar in vostro liogo
     Se ognun de vu, Poeti, no tolessi
     Far una metamorfose in t'un cuogo.
Oh Dio, se avessi grazia che podessi
     Aver pan per Soneti e per Canzon,
     Sì, che dì e note ve sfadigheressi!
So ben che troveressi invenzion
     De meter i Forneri anch'eli in Cielo
     In pe' d'un Orsa, un Toro o un Scarpion;
Nè se sentirìa tanti e questo e quelo
     Parlar se no de la passion d'amor,
     Ch'a tut'el mondo à roto mo el cervelo.
Quanti sospiri che ve vien dal cuor
     Solo coverta de amorose fiame
     Che va a camin francese dal Pistor!
Se avè un pezzo de pan o de salame,
     Se sentì altra pena maledeta
     Tiogo mì in vostro pe' morir da fame.
Simile a la gazuola xe el Poeta;
     Co no l'à sopa in te la magnaora
     La se mete a cantar la girometa.
Cussì canta el Poeta co' vien l'ora
     De disnar, e nol trova pan in tola;
     Che si dirà di questa mìa Signora?

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poeti_antichi_del_dialetto_veneziano_2.djvu/82&oldid=67869"