IN MORTE D'UN CAGNOLETTO
Ah povero animal, cara bestiola,
Mi no gavea altro ben che nel to' aspeto,
Morte t'à tiolto afin che per dispeto
Drio de ti me impicasse per la gola.
Un Can che stava sempre con mi a tola
E che dormiva nel mio proprio leto,
À piasso a la mia Stela, al mio Pianeto
Che fazza sta restante vita sola!
No so come l'intenso mio dolor
No m'abia fato che ghe mora drio.
Quanto al pensarlo me se spezza el cuor!
Oh gramo al mondo, misero Mafìo,
Oh sorte, oh Ciel, che me podeu più tior
Per cavarve la sè del fato mio?
