L'eco de Trento
Ò visto 'na putela gardesana
sentada in riva al lago, e contro al vento
de sponda veronese e de bressiana,
volava 'na canson de malcontento.
Quela canson che la parea lontana
parchè cantada soto vosse e a stento,
l'era de 'na putela forte e sana
sentada a Riva par cantarme Trento.
In fianco el Baldo, come 'na gran tenda
impiantada sul campo de batalia,
che de sti canti el par che 'l se ne intenda.
el g'à risposto: Come vela e remo
su la strada de Trento che no sbalia,
va la, putela, che se iutaremo!
