Santa Lussia no la ghe vede
— Senti, putin, cosa che ò visto ieri:
Ò visto Santa Lussia a spassesar,
l'ò vista andar su e zo par i sentieri
de 'na montagna e in sima a un luminar;
l'ò vista a far bao-sete par i veri
e po' da novo1 l'è tornà a scapar,
par far la guardia sora i copi neri
de un camineto che 'l volea fumar;
e dopo su la gresta de quel monte,
spetando inzenocià l'Ave Maria,
sminciando2 le casete mese sconte...
— Ma lu l'è mato!... Ci èlo che ghe crede
che Santa Lussia vada a far la spia,
se quela Santa, sior, no la ghe vede!...
